Հայաստանը դիմել է Խաղաղության եվրոպական գործիքի ներքո երրորդ աջակցության համար, այս մասին հայտարարել է արտաքին գործերի նախարար Արարատ Միրզոյանը մարտի 23-ին Ազգային ժողովի արտաքին հարաբերությունների մշտական հանձնաժողովում։
Նախարարը նշել է, որ Հայաստանի Հանրապետությունը ստացել է երկրորդ տրամադրումը 20 մլն եվրոյի աջակցության տեսքով և արդեն ներկայացրել է հաջորդ հայտը։
«Հայաստանի Հանրապետությունը ստացավ երկրորդ տրամադրումը խաղաղության եվրոպական խաղաղության գործիքի ներքո և արդեն երրորդի համար ենք դիմել»,- ասել է նախարարը։
Հունվարին Եվրոպական միությունը հաստատել է Խաղաղության եվրոպական հիմնադրամից երկրորդ անգամ Հայաստանի զինված ուժերին աջակցության տրամադրման որոշումը՝ հաղթահարելով ամիսներ տևած դիվանագիտական փակուղին և Հունգարիայի վետոն։ Աջակցությունը կազմել է 20 մլն եվրո, առաջին աջակցությունը եղել է 2024-ին՝ 10 մլն եվրո։
Աջակցության նպատակն է հզորացնել Հայաստանի զինված ուժերի լոգիստիկ կարողությունները՝ առաջնահերթությունը տալով ճգնաժամային իրավիճակներում քաղաքացիական անձանց պաշտպանությանը։ Ծրագիրը նախատեսում է բարձրացնել երկրի դիմակայունությունը և արագացնել հայկական ստորաբաժանումների փոխգործակցությունը միջազգային, այդ թվում՝ ԵՄ խաղաղապահ առաքելություններին հնարավոր մասնակցության համար։
Արարատ Միրզոյանի խոսքով՝ Եվրոպական միության հետ ընդլայնվել է համագործակցությունը պաշտպանական և անվտանգության ոլորտներում, տրվել է խորհրդակցությունների մեկնարկ և ուժի մեջ է մտել ճգնաժամային կառավարման գործողություններում Հայաստանի մասնակցության շրջանակը սահմանելու մասին համաձայնագիրը։
«Սա նշանակում է որ մենք մեր ընտրությամբ կարող ենք մասնակցել Եվրոպական միության տարբեր քաղաքացիական առաքելությունների»,- ասել է նախարարը։
Զեկույցի ընթացքում նախարարը տեղեկացրել է, որ վիզաների ազատականացման երկխոսության ուղղությամբ առաջընթաց է գրանցվել, և Հայաստանը բավականին արագ ստացել է համապատասխան գործողությունների պլանը։
«Վիզաների ազատականացման երկխոսության ուղղությամբ առաջընթաց է գրանցվել Հայաստանը բավականին արագ պետք է նկատել Եվրոպական միությունից ստացավ վիզաների ազատականացման գործողությունների պլանը»,- ասել է Միրզոյանը։
The post Հայաստանը դիմել է Խաղաղության եվրոպական գործիքի ներքո երրորդ աջակցության համար․ Միրզոյան appeared first on CIVILNET.