ԱՄՆ-ի Ազգային հակաահաբեկչական կենտրոնի ղեկավար Ջո Քենթը հրաժարական է տվել՝ իր որոշման պատճառը համարելով Իրանի դեմ պատերազմը, գրում է BBC-ն։
45-ամյա Քենթը, որը համակարգում էր ահաբեկչության դեմ պայքարը ԱՄՆ նախագահ Դոնալդ Թրամփի վարչակազմում, կոչ է արել Սպիտակ տանը «փոխել ուղղությունը»։
Քենթը Թրամփի թիմի անդամ էր և վաղեմի աջակից։ Քենթի թեկնածությունն Ազգային հակաահաբեկչական կենտրոնի ղեկավարի պաշտոնում հաստատվել էր ԱՄՆ Սենատի կողմից նախորդ տարվա հուլիսին։
Նա դարձել է Թրամփի վարչակազմի ամենաբարձրաստիճան պաշտոնյան, որը հրապարակայնորեն քննադատել է ԱՄՆ-Իսրայել գործողությունն Իրանում։
«Իրանը մեր երկրի համար անմիջական սպառնալիք չէր ներկայացնում, և պարզ է, որ մենք այս պատերազմն սկսեցինք Իսրայելի և Ամերիկայում նրա հզոր լոբբիի ճնշման տակ»,- ասել է Քենթը Թրամփին ուղղված նամակում, որը նա հրապարակել է առցանց։
Քենթը նաև պնդել է, որ «իսրայելցի բարձրաստիճան պաշտոնյաները» և ազդեցիկ ամերիկացի լրագրողները տարածել են «ապատեղեկատվություն», որը խաթարել է Թրամփի վարչակազմի «Ամերիկան առաջինը» քաղաքականությունը։
Սպիտակ տան մամուլի խոսնակ Քերոլայն Լիվիթը մեկնաբանել է Ջո Քենթի հրաժարականը։
«Այն անհեթեթ պնդումը, որ նախագահ Թրամփն այս որոշումը կայացրել է ուրիշների, նույնիսկ օտարերկրյա կառավարությունների ազդեցության տակ, և՛ վիրավորական է, և՛ ծիծաղելի»,- ասել է նա։