Ռուսական զինվորական դատարանը մերձմոսկովյան «Կրոկուս Սիթ Հոլլ»-ում ահաբեկչության չորս կատարողներին՝ Դալերջոն Միրզոևին, Սաիդակրամ Ռաչաբալիզոդային, Շամսիդին Ֆարիդունիին և Մուհամմադսոբիրու Ֆայզովային դատապարտել է ցմահ ազատազրկման։ Նրանք մեղավոր են ճանաչվել ահաբեկչական հարձակում կատարելու, ահաբեկչական գործունեությանն օժանդակելու, ահաբեկչական գործունեություն իրականացնելու նպատակով ուսուցում անցնելու և այլ հանցագործությունների մեջ, գրում է Meduza-ն։
Դատարանը նաև նրանց տուգանել է 990,000 ռուբլով։ Նրանք պատիժը կկրեն հատուկ ռեժիմի ուղղիչ գաղութում։
Դատարանը ցմահ ազատազրկման է դատապարտել նաև ահաբեկչական հարձակման գործով ևս 11 մեղադրյալի, որոնց հետաքննությունը համարում է հանցագործների հանցակիցներ։ Նրանք են՝ Ումեջոն և Մուստակիմ Սոլիևները, Շաքրոմջոն Գադոևը, Զուբայդուլո Իսմոիլովը, Հուսեյն Խամիդովը, Մուհամմադ Շարիպզոդան, Յակուբջոնի Յուսուֆզոդան, Նազրիմադ Լութֆուլլոյը, Ջումախոն Կուրբոնովը, Հուսեն Մեդովը և Ջաբրաիլ Աուշևը։
Չորս այլ մեղադրյալներ դատապարտվել են 19 տարի 11 ամսից մինչև 22,5 տարի ժամկետով ազատազրկման։
Ահաբեկչական հարձակումը տեղի է ունեցել 2024 թվականի մարտի 22-ին։ Ահաբեկիչները համալիր են ներխուժել այն պահին, երբ պետք է տեղի ունենար «Պիկնիկ» խմբի համերգը։ Նրանք կրակ են բացել հանդիսատեսի և համալիրի անձնակազմի վրա, ապա հրկիզել համերգասրահը։ Այս հարձակման հետևանքով 150 մարդ է զոհվել։
Հարձակման չորս անմիջական կատարողների հետ մեկտեղ՝ մեղադրանք է առաջադրվել նրանց ենթադրյալ հանցակիցներից 15-ին։
Հարձակման պատասխանատվությունը ստանձնել է «Վիլայաթ Խորասան» խմբավորումը , որն Աֆղանստանում «Իսլամական պետության» հետ կապված կազմակերպություն է։ Վլադիմիր Պուտինը պնդել էր, որ ահաբեկիչները գործել են Ուկրաինայի շահերից ելնելով։
Թարգմանությունը՝ Էմմա Չոբանյանի