Երեւան: Մեդիամաքս: Ադրբեջանի ղեկավար Իլհամ Ալիեւի հետ հեռախոսազրույցում Ռուսաստանի նախագահ Վլադիմիր Պուտինը երախտագիտություն է հայտնել «Իրանից ռուսաստանյան քաղաքացիների տարհանման կազմակերպման, ինչպես նաեւ Ռուսաստանից Իրանին ուղղված մարդասիրական օգնության ադրբեջանական տարածքով փոխադրման ապահովման համար արդյունավետ օժանդակության համար»։
«Մերձավոր Արեւելքի տարածաշրջանում ընթացիկ իրավիճակի շուրջ կարծիքների փոխանակության ժամանակ առաջնորդները հանդես են եկել ռազմական գործողությունները հնարավորինս արագ դադարեցման եւ ներկայիս սուր հակամարտությունը քաղաքական-դիվանագիտական միջոցներով կարգավորման օգտին։
Քննարկվել են երկկողմ օրակարգի որոշ արդիական հարցեր։ Հաստատվել է ռուս-ադրբեջանական համագործակցությունը տարբեր ոլորտներում զարգացնելու փոխադարձ տրամադրվածությունը՝ ռազմավարական գործընկերության հարաբերությունների սկզբունքների հիման վրա», – նշվում է Կրեմլի մամուլի ծառայության հաղորդագրության մեջ։
Իլհամ Ալիեւը եւ Վլադիմիր Պուտինը վերջին անգամ հեռախոսով խոսել էին 2025թ. դեկտեմբերի 24-ին, երբ ՌԴ նախագահը շնորհավորել էր Ադրբեջանի պաշտոնակցին ծննդյան օրվա կապակցությամբ: