«Հարված է հասցվել Թեհրանի հայկական Մաջիդիե թաղամասին, դրան մոտ հայկական մի միություն կա, այնտեղ ապակիներ են փշրվել, հայ մարդ լուրջ վնասվածքներ չի ստացել։ Ըստ լուրերի՝ հարվածից հետո 20 մարդ զոհվել է, նրանց թվում հայեր չկան, բայց մի փոքր հայ երեխա վիրավորվել է»,- Factor TV-ի հետ զրույցում հայտնեց Թեհրանի հայկական «Արաքս» թերթի գլխավոր խմբագիր Մովսես Քեշիշյանը։
Ըստ նրա՝ Իրանի այլ հայկական թաղամասերին մոտ հարձակումներ եղել են, սակայն հայերի շրջանում զոհեր կամ վիրավորներ չկան։ Հարցին՝ ինչո՞ւ է թիրախավորվել հենց հայկական թաղամասը, Քեշիշյանը պատասխանեց․ «Նրանք թիրախավորում են ոչ միայն ռազմական օբյեկտները, այլ նաև ոստիկանատները, այդ տարածքում ոստիկանատուն կար։ Մյուս տեղերն էլ, որ նորից հայկական թաղամասերին մոտիկ էին, ոստիկանատներ են եղել, որ հարվածվել են»։
Քեշիշյանը նշեց, որ չնայած պատերազմական վիճակ է, միևնույն է՝ մարդիկ շարունակում են ապրել առօրյա կյանքով, այնպես չէ, որ տներից դուրս չեն գալիս։
«Մարդիկ իրենց խանութներն են գնում, իրենց փոքր աշխատանքները գործում են, խանութները բաց են, կյանքը նորմալ ընթանում է։ Բայց դրա կողքին մեծ գործարանները արձակված են, և այն տեղերը, որ մարդկանց զանգվածային, այսպես, հավաքներ է լինում, կամ տեղեր, որոնք մարդիկ կարող են աշխատել, ինչպիսին, ասենք, մարզադահլիճները, մարդկանց կուտակում է լինում, այդ տեսակ տեղերը փակում են, որպեսզի մարդկանց համար վտանգ չստեղծվի»,-նշեց նա։
Հիշեցնենք՝ մարտի 9-ին Իրանում գերագույն հոգևոր առաջնորդ է նշանակվել Մոջթաբա Խամենեիին։ Նա կփոխարինի հորը՝ սպանված գերագույն առաջնորդ Ալի Խամենեիին։
Քեշիշյանի խոսքով՝ նոր առաջնորդի ընտրությունը իրենց համար սովորական հարց է, մարդիկ նրանից փոփոխությունների են սպասում․ «Մարդիկ սպասում են՝ իրենց կյանքում փոփոխություն լինի։ Եվ նոր առաջնորդը, կարծում եմ, եթե առաջին մտահոգությունը այսօր պատերազմն է ու դրա կարգավորումը, ապա երկրորդ և հիմնական իր խնդիրը պիտի լինի ժողովրդի դժվարություններին լուծում տալը և կառավարությանն ուղղություն տալ, որպեսզի այդ հարցերին լուծում տա։ Դա երևի մնում է պատերազմից հետո»։
Եվգենյա Համբարձումյան