Ըստ ԶԼՄ-ների՝ մահացած տղամարդը Սյունիքի կայազորի զինվորական դատախազության նախկին դատախազ Տիգրան Սուքիասյանն էր
ԵՐԵՎԱՆ, 24 փետրվարի․/Նովոստի-Արմենիա/․ Փետրվարի 22-ին ողբերգական դեպք էր տեղի ունեցել Երևանում։
ՆԳՆ Փրկարար ծառայությունը տեղեկացրել էր, որ ժամը 15:32-ին ՆԳՆ 112 օպերատիվ կառավարման կենտրոն ահազանգ է ստացվել, որ քաղաքացին փորձում է ինքնասպանություն գործել՝ նետվելով Հաղթանակի կամրջից. անհրաժեշտ է փրկարարների օգնությունը:
Դեպքի վայր են մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատից մեկ մարտական հաշվարկ, Հոգեբանական աջակցության և բժշկական ապահովման վարչության հերթապահ խումբը։
Մինչ փրկարարների կանչի վայր հասնելը՝ քաղաքացին նետվել է կամրջից։
«Նովոստի-Արմենիա»-ին ՀՀ քննչական կոմիտեից հայտնել են, որ դեպքի առթիվ նախաձեռնվել է քրվարույթ։
«Դեպքի առթիվ նախաձեռնվել է քրեական վարույթ՝ Քրեական օրենսգրքի 162-րդ հոդվածի 1-ին մասով (ինքնասպանության հասցնելը)։ Նշանակվել է դիակի դատաբժշկական փորձաքննություն։ Կատարվում է նախաքննություն», -նշված է հաղորդագրության մեջ։
Նշենք, որ ըստ ԶԼՄ-ների՝ մահացած տղամարդը Սյունիքի կայազորի զինվորական դատախազության նախկին դատախազ Տիգրան Սուքիասյանն էր։ ՆԳՆ-ն չի մեկնաբանում այս տեղեկությունը։