Բրիտանական կինոյի և հեռուստատեսային արվեստների ակադեմիայի (BAFTA) 79-րդ մրցանակաբաշխությունը տեղի է ունեցել Լոնդոնում կիրակի՝ փետրվարի 22-ին:
Փոլ Թոմաս Անդերսոնի «Մարտը մարտից հետո» One Battle After Another ֆիլմը արժանացել է ամենաշատ մրցանակների (վեց), մինչդեռ ռուս ռեժիսոր Պավել Տալանկինի և ամերիկացի ռեժիսոր Դեյվիդ Բորենշտեյնի «Պարոն Ոչ ոքն ընդդեմ Պուտինի» ֆիլմն արժանացել է «Լավագույն վավերագրական ֆիլմ» մրցանակի, գրում է DW-ի ռուսական ծառայությունը:
Անդերսոնի ֆիլմը, որի գլխավոր դերերում են Լեոնարդո ԴիԿապրիոն, Շոն Փենը, Բենիսիո դել Տորոն և Թեյանա Թեյլորը, առաջադրվել է 14 անվանակարգերում: Ֆիլմը, որը պատմում է Միացյալ Նահանգներում ձախակողմյան արմատական խմբավորման անդամների կյանքի մասին, արժանացել է մրցանակների «Լավագույն ֆիլմ», «Լավագույն ադապտացված սցենար», «Լավագույն օպերատորական աշխատանք» և «Լավագույն մոնտաժ» անվանակարգերում: Անդերսոնն ինքը հաղթել է «Լավագույն ռեժիսոր» անվանակարգում, իսկ Փենը՝ «Երկրորդ պլանի լավագույն դերասան» անվանակարգում։
Ռայան Քուգլերի ռեժիսորությամբ նկարահանված ամերիկյան «Մեղավորները» սարսափ ֆիլմը զբաղեցրել է երկրորդ տեղը՝ ամենաշատ մրցանակներով։ Ֆիլմը, որը ստացել էր 13 անվանակարգ, հաղթել է «Լավագույն օրիգինալ սցենար» և «Լավագույն օրիգինալ երաժշտություն» անվանակարգերում։ Նիգերիացի-բրիտանացի դերասանուհի Վունմի Մոսակուն, որը նկարահանվել է «Մեղավորները» ֆիլմում, արժանացել է երկրորդ պլանի լավագույն դերասանուհու մրցանակին։
ԴիԿապրիոն, որը նկարահանվել է «Մարտը մարտից հետո» ֆիլմում, ֆրանսիացի ու ամերիկացի դերասան Թիմոթի Շալամեն, որը նկարահանվել է Ջոշ Սաֆդիի «Մարտին Հրաշալի» ֆիլմում, մնացել են առանց մրցանակների: Վերջին ֆիլմը ստացել է 11 անվանակարգ, բայց չի կարողացել հաղթել ոչ մեկում։
Լավագույն դերասան անվանակարգում ԴիԿապրիոյից և Շալամեից առաջ է անցել բրիտանացի Ռոբերտ Արամայոն, որը «Ես կռվում եմ» I Swear) ֆիլմում խաղացել է Ջոն Դևիդսոնի՝ շոտլանդացի ակտիվիստի դերը, որը խոսում է Տուրետի համախտանիշի մասին:
Լավագույն դերասանուհու մրցանակը շնորհվել է իռլանդացի Ջեսի Բաքլիին, որը նկարահանվել է Քլոե Չժաոյի «Համնետ» պատմական ողբերգության մեջ, որը պատմում է Ուիլյամ Շեքսպիրի որդու կյանքի մասին: 11 անվանակարգում մրցանակ ստացած ֆիլմը նաև ճանաչվել է «Լավագույն բրիտանական ֆիլմ»։
Դանիա-չեխական համատեղ արտադրության «Պարոն Ոչ ոքն ընդդեմ Պուտինի» ֆիլմը, որը պատմում է ռուսական դպրոցներում քարոզչության մասին, արժանացել է «Լավագույն վավերագրական ֆիլմ» մրցանակին: Այն հիմնված է Չելյաբինսկի մարզի Կարաբաշ քաղաքի դպրոցի ուսուցիչ և կազմակերպիչ Պավել Տալանկինի կողմից նկարահանված տեսանյութերի վրա՝ սկսած Ռուսաստանի կողմից Ուկրաինա լայնածավալ ներխուժման սկզբից՝ 2022 թվականի փետրվարին:
Ֆիլմի պրեմիերան տեղի է ունեցել 2025 թվականի հունվարի 25-ին Սանդենսի կինոփառատոնում, որտեղ այն արժանացել է ժյուրիի հատուկ մրցանակի։ «Պարոն Ոչ ոքն ընդդեմ Պուտինի»-ն նաև առաջադրվել է «Օսկար» մրցանակի լավագույն վավերագրական ֆիլմ անվանակարգում։
Թարգմանությունը՝ Էմմա Չոբանյանի