Փետրվարի 19-ին Վաշինգտոնի Waldorf Astoria հյուրանոցի դիմաց տեղի ունեցավ միջադեպ, երբ Ադրբեջանի նախագահ Իլհամ Ալիևի թիկնապահները հարձակվեցին ԱՄՆ-ում բնակվող ադրբեջանցի ցուցարարների վրա: Նրանք բողոքի ցույց էին անցկացնում՝ պահանջելով Ադրբեջանում քաղբանտարկյալների ազատ արձակումը։ Uber-ի վարորդ Ռահիմ Յագուբլուն, ով նաև ընդդիմադիր Թոֆիգ Յագուբլուի որդին է, հայտնել է, որ թիկնապահները հարվածել են իրեն՝ վնասելով ծնոտն ու որովայնը։ Մեկ այլ ցուցարար՝ Ադիլ Ամրահլին, վիրավորվել է ոտքից՝ փորձելով փախչել հարձակվողներից։ Ընդհանուր առմամբ, առնվազն չորս մարդ ստացել է վնասվածքներ։
Վաշինգտոնի ոստիկանության խոսնակ Թոմ Լինչը հայտնել է, որ միջադեպի ժամանակ դեպքի վայրում եղել են ԱՄՆ գաղտնի ծառայության հատուկ գործողությունների ստորաբաժանման անդամները, սակայն չի հստակեցրել՝ ոստիկանությունը միջամտե՞լ է, թե ոչ։ Գաղտնի ծառայության խոսնակ Էնթոնի Գուլիելմին ընդգծել է, որ հյուրանոցը համապատասխանում է անվտանգության չափանիշներին, իսկ նրանց դերը պետությունների ղեկավարների անվտանգությունն ապահովելն է։
Ցուցարարները փորձել են Ալիևին թույլ չտալ աննկատ հեռանալ հյուրանոցի մի մուտքից մյուսը, սակայն թիկնապահները հեռացրել են նրանց դեպքի վայրից։ Ցուցարարները շտապօգնություն են կանչել, և վնասվածքները զննվել են, սակայն հիվանդանոց տեղափոխվածներ չեն եղել։ Ներկայումս Վաշինգտոնի դատախազությունը հետաքննում է Waldorf Astoria հյուրանոցի դիմաց Ադրբեջանի նախագահ Իլհամ Ալիևի թիկնապահների կողմից ծեծի միջադեպը, հաղորդում է «Ազատություն» ռադիոկայանի Վաշինգտոնի թղթակիցը, որին հղում է անում կայանի ադրբեջանական ծառայությունը։