Քննարկվում է Զապորոժիեի ԱԷԿ-ի մոտ հրադադարի նոր ռեժիմ սահմանելու հնարավորությունը. Գրոսի

Բաժանորդագրվել

Հոկտեմբերին Գրոսիի միջնորդությամբ հաջողվեց համաձայնեցնել հրադադարի ութերորդ ռեժիմը։

ԵՐԵՎԱՆ, 18 նոյեմբերի – Sputnik. ՄԱԳԱՏԷ-ն քննարկում է Զապորոժիեի ԱԷԿ-ի մոտ նոր հրադադար հաստատելու հնարավորությունը` վնասված էլեկտրահաղորդման գծերը վերականգնելու համար։ Այս մասին հայտարարել է գործակալության գլխավոր տնօրեն Ռաֆայել Գրոսին՝ ելույթ ունենալով ՄԱԳԱՏԷ-ի կառավարիչների խորհրդի նիստի բացման ժամանակ։

Նա նշել է, որ հակամարտությունից առաջ կայանը 10 արտաքին էլեկտրամատակարարման գիծ ուներ, սակայն հիմա միջուկային անվտանգությունն ապահովելու համար ԱԷԿ–ը կախված է միայն մեկից`330 կՎ լարումով «Ֆերոսպլավնայա-1»-ից։

Հոկտեմբերին Գրոսիի միջնորդությամբ հաջողվեց համաձայնեցնել ութերորդ հրադադարը, որը թույլ տվեց վերականգնել էլեկտրամատակարարումն այդ գծով։ Սակայն անցյալ շաբաթ վերանորոգված ենթակառուցվածքը կրկին վնասվել է մարտական գործողությունների հետևանքով։

«Այժմ քննարկվում է 9-րդ հրադադարի հաստատման հնարավորությունը` «Դնեպրովսկայա» ենթակայանում և 750 կՎ էլեկտրահաղորդման գծում վերանորոգման աշխատանքներ կատարելու համար, որոնք հունիսին իրականացված վերանորոգումներից հետո կրկին լուրջ վնասներ են կրել: Օդային հարվածներն ի չիք են դարձրել վերջին ամիսների բոլոր ջանքերը, որոնք ուղղված էին մինչև ձմռան սկիզբն արտաքին էլեկտրամատակարարման երկրորդ գծի վերականգնմանը», – հայտարարել է Գրոսին։

ՄԱԳԱՏԷ–ի կառավարիչների խորհրդի նիստերն անցկացվում են փակ դռների հետևում: Գրոսիի ելույթի տեքստը տարածել է գործակալության մամուլի ծառայությունը։

Leave a comment