Գերմանիան 300 միլիոն դոլար կհատկացնի Ուկրաինային տրամադրվող ռազմական օգնության նոր փաթեթի համար՝ PURL նախաձեռնության շրջանակներում, որը նպաստում է ամերիկյան արտադրության սպառազինության ձեռքբերմանը։
Ֆինանսավորումն ուղղված կլինի առաջնահերթորեն Ուկրաինայի հակաօդային պաշտպանության (ՀՕՊ) կարողությունների ամրապնդմանը։
Այս մասին հայտնել է Գերմանիայի պաշտպանության նախարար Բորիս Պիստորիուսը Բրյուսելում ԵՄ խորհրդի նիստից առաջ։
Նախարարի խոսքով՝ Գերմանիան, Նորվեգիայի հետ համատեղ, միանում է ամերիկյան սպառազինության ձեռքբերման նոր նախաձեռնությանը։ Սա PURL-ի շրջանակներում արդեն հինգերորդ փաթեթն է, որին մասնակցում է Բեռլինը՝ հատկացնելով 300 միլիոն դոլար։
Այս օգնության հիմնական մասը նախատեսված է «Patriot» ՀՕՊ համակարգերի համար PAC-2 և PAC-3 կառավարվող հրթիռների ձեռքբերմանը։ Այս զինամթերքը կենսական նշանակություն ունի Ուկրաինայի համար՝ ռուսական օդային հարձակումներին, հատկապես բալիստիկ հրթիռների կիրառմամբ իրականացվող հարձակումներին հակազդելու գործում։
Բեռլինը նաև կշարունակի Ուկրաինային մատակարարել IRIS-T ՀՕՊ համակարգեր և դրանց համար նախատեսված հրթիռներ։
Բացի այդ, Գերմանիան աշխատում է IRIS-T հրթիռները նորվեգական NASAMS ՀՕՊ համակարգերի մեջ ինտեգրելու ուղղությամբ. այս քայլը նպատակ ունի ընդլայնել առկա հակաօդային պաշտպանության միջոցների գործառնական հնարավորությունները։
Նախատեսված օգնության փաթեթը ներառում է նաև.
օդային տարածքի հսկողության համար նախատեսված նոր ռադարային կայաններ,
զինամթերք Ուկրաինայի F-16 կործանիչների համար,
սպառազինություն անօդաչու թռչող սարքերի (ԱԹՍ) համար։
Պիստորիուսն ընդգծել է, որ Ուկրաինան հրատապ կարիք ունի ամրապնդելու իր հակաօդային պաշտպանությունը՝ հաշվի առնելով ձմեռային սեզոնին ընդառաջ էներգետիկ ենթակառուցվածքների վրա ռուսական հարձակումները։