Թրամփը վաճառել է Nvidia-ում իր բաժնետոմսերը՝ Հուանգի՝ ենթադրյալ «լրտեսի» հետ կապ ունենալու տեղեկությունների ֆոնին

ԱՄՆ նախագահ Դոնալդ Թրամփը վաճառել է 500,000-ից մինչև 1 միլիոն դոլար արժողությամբ Nvidia-ի բաժնետոմսեր՝ ընդամենը հինգ օր անց այն բանից հետո, երբ պետքարտուղար Մարկո Ռուբիոն նրան տեղեկացրել է ընկերության գործադիր տնօրեն Ջենսեն Հուանգի և չինացի լրտեսի միջև ենթադրյալ կապերի մասին. այս մասին հայտնել է CNBC-ն՝ հղում կատարելով ԱՄՆ ղեկավարի ֆինանսական հայտարարագրերին։

Ինչպես ավելի վաղ հաղորդել էր «The New York Times»-ը, Ռուբիոն Թրամփին այդ հետախուզական տվյալների մասին տեղեկացրել է մայիսի 13-ին՝ այն պահին, երբ Հուանգը պատրաստվում էր բարձրանալ նախագահական ինքնաթիռ (Air Force One)՝ Ալյասկայում վառելիքի լիցքավորման կանգառի ժամանակ։ Այդ ընթացքում գործադիր տնօրենն ուղեկցում էր նախագահին Չինաստան կատարած պետական ​​այցի շրջանակներում։ CNBC-ի տվյալներով՝ մինչև մայիսի 18-ը Թրամփն արդեն վաճառել էր Nvidia-ի՝ 500,000-ից մինչև 1 միլիոն դոլար արժողությամբ արժեթղթերը։ Ավելի ուշ ԱՄՆ նախագահը հերքել է, որ Ռուբիոյից նման տեղեկություն է ստացել։

Ըստ հեռուստաալիքի՝ 2025 թվականի հունվարին Թրամփի՝ Սպիտակ տուն վերադառնալուց ի վեր, նրա ներդրումային հաշիվների միջոցով իրականացվել է Nvidia-ի բաժնետոմսերի առնվազն 103 գործարք՝ ընդհանուր 27 միլիոնից մինչև 97,5 միլիոն դոլար արժողությամբ։

Սպիտակ տունն իր հերթին հայտարարել է, որ Թրամփի ներդրումային պորտֆելը կառավարվում է անկախ խորհրդատուների կողմից՝ առանց սեփականատիրոջ անմիջական մասնակցության։ «Թրամփ կազմակերպության» (Trump Organization) խոսնակ Քիմբերլի Բենզան պարզաբանել է, որ այս մոտեցումը նպատակ ունի բացառել նույնիսկ շահերի բախման տպավորությունը։

Ինչպես նշել է լրատվամիջոցը, ֆինանսական հայտարարագրերում որևէ ապացույց չկա այն մասին, որ Թրամփն անձամբ է ուղղորդել գործարքները, կամ որ նրա ակտիվները կառավարող անձինք հասանելիություն են ունեցել գաղտնի հետախուզական տվյալների։

Ըստ CNBC-ի վերլուծության՝ 2025 թվականի վերջի դրությամբ Nvidia-ն Թրամփի պորտֆելում առկա առանձին բաժնետոմսերի խոշորագույն ներդրումների եռյակում է եղել։ Դրա արժեքը գնահատվել է 12,5-ից մինչև 58 միլիոն դոլար՝ նախորդ տարվա 615 հազարից մինչև 1,3 միլիոն դոլարի համեմատ։ 2026 թվականի առաջին ութ ամիսների ընթացքում նախագահի հաշիվների միջոցով իրականացվել է Nvidia-ի բաժնետոմսերի հետ կապված ևս 38 գործարք։

CNBC-ն նշել է, որ Թրամփն ու Հուանգը հանդիպել են կամ մասնակցել նույն միջոցառումներին առնվազն 15 անգամ՝ այն պահից ի վեր, երբ հանրապետականը վերադարձել է Սպիտակ տուն։ Այդ ընթացքում նախագահի ներդրումային հաշիվներն օգտագործվել են Nvidia-ի բաժնետոմսերով գործարքներ կատարելու համար. դա համընկել է այն ժամանակահատվածների հետ, երբ նրա վարչակազմը որոշումներ էր կայացնում, որոնք ազդում էին Չինաստանում ընկերության գործունեության վրա։

Օրինակ՝ 2025 թվականի հունվարի 31-ին Սպիտակ տանը Թրամփի և Հուանգի միջև կայացած առաջին հանդիպումից երկու օր առաջ նախագահի ակտիվները կառավարողները ձեռք են բերել Nvidia-ի բաժնետոմսեր՝ 1-ից 5 միլիոն դոլար արժողությամբ։ Նույն տարվա օգոստոսին՝ այն համաձայնագրի հայտարարումից մեկ շաբաթ անց, ըստ որի՝ Չինաստանին վաճառված Nvidia-ի չիպերից ստացված հասույթի 15%-ը պետք է փոխանցվեր ԱՄՆ կառավարությանը, Թրամփի հաշիվների միջոցով գնվել են ընկերության բաժնետոմսեր՝ 5-ից 25 միլիոն դոլար արժողությամբ։

Leave a comment