Հայաստանի արդարադատության նախարար Սրբուհի Գալյանի նախագահությամբ անցկացվել է Սահմանադրական բարեփոխումների խորհրդի հերթական նիստը, որի ընթացքում շարունակվել են նոր Սահմանադրության դրույթների քննարկումները։ Այդ մասին նախարարը հայտնել է ֆեյսբուքյան իր էջում:
Շարունակվել են Սահմանադրության՝ մարդու հիմնարար իրավունքներին, ազատություններին և պարտականություններին, կուսակցություններին ու զանգվածային լրատվության միջոցներին, անկախ և ինքնավար պետական մարմիններին, նաև Մարդու իրավունքների հանձնակատարին վերաբերող գլուխների քննարկումը։
«Խորհուրդը շարունակել է նաև քննարկել խորհրդի անդամ Դանիել Իոաննիսյանի առաջարկները»,- գրել է Սրբուհի Գալյանը։
Ավելի վաղ լրագրողների հետ ճեպազրույցում արդարադատության նախարարը հայտնել է, որ Հայաստանի նոր Սահմանադրության նախագծի ամբողջական տեքստի հրապարակումը նախատեսված է նոյեմբեր ամսին։