ԱՄՆ-ի և Կանադայի միջև առևտրային մաքսատուրքերի շուրջ անորոշությունը բարձրացնում է կապիտալի ներգրավման արժեքը և զսպում բիզնեսի ներդրումային ակտիվությունը, հաղորդում է CNBC-ն։
Նյու Յորքի Դաշնային պահուստային բանկի հետազոտության համաձայն՝ մաքսատուրքերի հետևանքով առաջացող ծախսերի շուրջ 90%-ը կրում են ամերիկյան ներմուծողները։ Դա կարող է առաջիկայում լրացուցիչ ճնշում գործադրել սպառողական գների վրա։
Կանադայից ներմուծվող ապրանքների նկատմամբ ԱՄՆ-ի գանձած մաքսատուրքերի ընդհանուր ծավալը հասել է 10 մլրդ դոլարի՝ նախորդ ժամանակահատվածի 400 մլն դոլարի դիմաց։
Չնայած առևտրային սահմանափակումներին՝ ԱՄՆ-ի և Կանադայի միջև ապրանքաշրջանառությունը կազմել է 570 մլրդ դոլար։
ԱՄՆ-ում Կանադայի դեսպան Մարկ Ուայզմանի խոսքով՝ «անորոշությունը բարձրացնում է կապիտալի արժեքը»։ Նա ընդգծել է, որ նոր արտադրական ձեռնարկություններ կառուցելու և երկարաժամկետ ներդրումներ իրականացնելու համար ընկերություններին անհրաժեշտ է կանխատեսելի տնտեսական միջավայր։
Վաշինգտոնն ու Օտտավան շարունակում են բանակցությունները մետալուրգիական արտադրանքի և ավտոմեքենաների նկատմամբ մաքսատուրքերի նվազեցման շուրջ։
B20 գագաթնաժողովում եվրոպական երկրների ներկայացուցիչները ևս նշել են, որ միջազգային առևտրի կարգավորումների հաճախակի փոփոխությունները ստիպում են ընկերություններին ավելացնել իրավաբանական սպասարկման և կարգավորող պահանջներին համապատասխանության ծախսերը՝ սահմանափակելով բիզնեսի զարգացմանն ուղղվող միջոցները։
Միաժամանակ ԱՄՆ-ն և Չինաստանը քննարկում են ընդհանուր 60 մլրդ դոլար արժողությամբ ապրանքների նկատմամբ մաքսատուրքերի փոխադարձ նվազեցումը։
Նախատեսվում է, որ կողմերից յուրաքանչյուրը մաքսային արտոնություններ կտրամադրի 30 մլրդ դոլարի ներմուծման համար։ ԱՄՆ-ի արտոնությունները հիմնականում կվերաբերեն խաղալիքներին և սպորտային ապրանքներին, իսկ Չինաստանինը՝ գյուղատնտեսական արտադրանքին։
Վաշինգտոնի նպատակներից է նաև Չինաստանի հետ առևտրային դեֆիցիտի կրճատումը, որը գերազանցել է 202 մլրդ դոլարը։
Փորձագետների գնահատմամբ՝ առևտրային խոչընդոտների նվազեցումը կարող է խթանել ԱՄՆ-ի մանրածախ առևտուրը, սակայն նախատեսվող փոփոխությունների ուժի մեջ մտնելու հստակ ժամկետները դեռ որոշված չեն։