Սննդամթերքի անվտանգության տեսչական մարմնի լաբորատոր փորձաքննությամբ պարզվել է, որ «Նոր Զովք» ՍՊԸ-ի արտադրամասում արտադրվող մի շարք հրուշակեղեն և սննդամթերք չեն համապատասխանում սահմանված անվտանգության նորմերին։ Տեսչական մարմինը կասեցրել է հինգ արտադրատեսակի արտադրությունը։
ՍԱՏՄ-ի հաղորդագրությունը՝ ստորև․
Սննդամթերքի անվտանգության տեսչական մարմնի տեսուչների կողմից «Նոր Զովք» ՍՊ ընկերությանը պատկանող հացի, հացաբուլկեղենի, հրուշակեղենի և մսային կիսաֆաբրիկատների արտադրամասում (ք․ Երևան, Ա․ Բաբաջանյան 52 շ․, 140 խանութ) իրականացված վերահսկողության ընթացքում նմուշառված մի շարք արտադրատեսակներ տրվել են լաբորատոր փորձաքննության. արդյունքում արձանագրվել է, որ արտադրվում է վտանգավոր սննդամթերք:
Ի մասնավորի՝ «Դոնաթսներ», «Էկլեր» և «Նրբաբլիթ մսով (տավարի)» արտադրատեսակների նմուշները՝ «ՄԱՖԱնՄՔ» (մեզոֆիլային աերոբ և ֆակուլտատիվ անաերոբ մանրէների քանակ) և «ԱՑԽՄ» (աղիքային ցուպիկի խմբի մանրէներ), «Տորթ» արտադրատեսակի նմուշը՝ «ԱՑԽՄ», իսկ «Հոթ դոգ» արտադրատեսակի նմուշը՝ «ՄԱՖԱնՄՔ» ցուցանիշներով չեն համապատասխանել Մաքսային միության տեխնիկական կանոնակարգերով սահմանված նորմերին:
Տեսչական մարմնի ղեկավարի որոշմամբ՝ «Նոր Զովք»-ի հացի, հացաբուլկեղենի, հրուշակեղենի և մսային կիսաֆաբրիկատների արտադրամասի արտադրական գործունեության առանձին գործառույթը՝ «Դոնաթսներ», «Էկլեր», «Տորթ», «Նրբաբլիթ մսով (տավարի)», «Հոթ դոգ» արտադրատեսակների արտադրությունը, կասեցվել է:
Ընկերության տնօրինությանը հանձնարարվել է ձեռնարկել անհրաժեշտ միջոցներ և նշված արտադրատեսակները համապատասխանեցնել Մաքսային միության օրենսդրության պահանջներին:
Խախտումների վերացման համար ժամկետ է սահմանվել: