Քաղաքականություն
11.11.2026 | 18:27
Ռուսաստանի և Ուկրաինայի միջև ռազմագերիների փոխանակումը կարող է տեղի ունենալ առաջիկա երկու-երեք շաբաթվա ընթացքում։ Այս մասին հայտարարել է ՌԴ Գլխավոր շտաբի տեղեկատվության վարչության պետի առաջին տեղակալ Ալեքսանդր Զորինը, որը մասնակցել է Աբու Դաբիում կայացած բանակցություններին, գրում է BBC-ի ռուսական ծառայությունը։
«Առաջիկա, հնարավոր է՝ երկու-երեք շաբաթվա ընթացքում, երբ համաձայնեցվեն փոխանակման ընթացակարգի հետ կապված բոլոր հարցերը»,- «Վեստի»-ին ասել է գեներալ Զորինը։
Նրա խոսքով՝ սա կլինի ամենամասշտաբային փոխանակումներից մեկը․ յուրաքանչյուր կողմից՝ ավելի քան հազար ռազմագերի։
Ռազմագերիների լայնածավալ փոխանակումները Ռուսաստանի, Ուկրաինայի և ԱՄՆ-ի միջև եռակողմ բանակցությունների միակ նշանակալի արդյունքն են։ Բանակցությունները տեղի են ունեցել երեքշաբթի և չորեքշաբթի՝ առաջին անգամ փետրվարից ի վեր։
Ուկրաինական կողմն ավելի վաղ հայտարարել էր նոր փոխանակման մասին, իսկ Ռուսաստանի պատվիրակության ղեկավար Վլադիմիր Մեդինսկին բանակցությունների արդյունքներին նվիրված մամուլի ասուլիսի ժամանակ հաստատել էր այդ ծրագրերը։
Թարգմանությունը՝ Էմմա Չոբանյանի