«Ժողովուրդ» օրաթերթը գրում է. ««Ժողովուրդ» օրաթերթի՝ նոյեմբերի 3-ի հրապարակմամբ տեղեկացրել էինք, որ ՔՊ-ի ներսում 2028 թվականի Երևանի քաղաքապետի ընտրություններին ընդառաջ մրցակցություն է հասունանում Տիգրան Ավինյանի և Ալեն Սիմոնյանի միջև։
Երեկ Տիգրան Ավինյանին ուղղված հայտնի քննադատությունից հետո Սիմոնյանը կիսվեց տեսանյութով՝ փաստացի հանրայնացնելով ու ավելի տարածելով քաղաքապետի հասցեին հնչած քննադատությունը։ Այս քայլը, ՔՊ-ին մոտ կանգնած մեր աղբյուրների փոխանցմամբ, միանշանակ չի ընդունվել նույնիսկ կուսակցության ներսում. Ալեն Սիմոնյանի պահվածքը նյարդայնացրել, ոմանց մոտ էլ խիստ դժգոհություն է հարուցել, իսկ նրա քայլը ներքաղաքական մրցակցության համատեքստում ընկալվել է, մեղմ ասած, ոչ թիմային։
Ավելին՝ կուսակցական շրջանակներում նույնիսկ հեգնել են, որ եթե սկսեն Ալեն Սիմոնյանի թերությունների մասին խոսող գրառումներով ու եթերներով կիսվել ու տարածել, ապա վերջինս ամենօրյա դեպրեսիա կապրի, քանզի ծանր բացահայտումներ կլինեն։
Թերևս այս պատճառով է, որ տեսանյութը տարածելուց հետո ԱԽՔ Ալեն Սիմոնյանը երկու ուղիղ եթեր է ունեցել՝ փորձելով բացատրել իր քայլը և ափսոսանք հայտնել, որ արձագանքները սպասված չէին։ Ստացվում է՝ մեկ տեսանյութի տարածումը վերածվել է մի ամբողջ ներքաղաքական բացատրական արշավի։ Իսկ Ալեն Սիմոնյանի պահվածքը կարող է քննարկվել կուսակցության առաջիկա նիստերից մեկում»։
«Հրապարակ» թերթը գրում է. ««Նուբարաշեն» ՔԿՀ-ում սկանդալային վարույթ է հարուցվել, բայց ոչ թե Արսեն Գեւորգյանի մահվան առիթով, այլ կալանավորներից մեկի՝ հեռախոս գործածելու:
Մեր տեղեկություններով՝ մեղադրանք է առաջադրվել բանտի 6 աշխատակցի` Ալբերտ Հարությունյանը, Էդգար Ղազարյանը, Ռուբեն Ասատրյանը, Նարեկ Բալդրյանը, Կարապետ Պողոսյանը, Ռազմիկ Գասպարյանը մեղադրվում են ծառայողական պարտականությունները ոչ պատշաճ կատարելու համար։
Ըստ մեղադրանքի՝ նրանք լիարժեք չեն վերահսկել խցերը, չեն խուզարկել, ինչի հետեւանքով կալանավոր Հովհաննես Սաֆարյանը երկար ժամանակ բջջային հեռախոս է օգտագործել եւ դրա միջոցով ձեռք բերել ու տարածել անչափահասների վերաբերյալ պոռնկագրական նյութեր։ Սաֆարյանը դատապարտվել է 10 տարվա ազատազրկման, գործի վերաբերյալ ինֆորմացիան «Դատալեքս»-ում փակ է։
Ըստ մեղադրանքի՝ ՔԿՀ աշխատողների անփութության հետեւանքով կալանավորը շարունակել է ծանր հանցագործություն կատարել նաեւ բերդում գտնվելու ժամանակ։