Ադրբեջանի նախագահ Իլհամ Ալիևը հայտարարել է, որ Ռուսաստանը հարվածներ է հասցրել Ուկրաինայի տարածքում գտնվող իր երկրի դիվանագիտական օբյեկտներին։ Այդ մասին նա հայտնել է Ուկրաինայի նախագահ Վլադիմիր Զելենսկիի հետ հանդիպումից հետո, փոխանցում է The Insider-ը։
Ալիևի խոսքով՝ Ուկրաինայում Ադրբեջանի դեսպանատունը հարձակման է ենթարկվել երեք անգամ։
«Ուկրաինայում մեր դեսպանատան վրա երեք հարված է հասցվել։ Առաջինից հետո մտածեցինք, որ դա կարող էր պատահական լինել։ Այնուհետև ռուսական կողմին փոխանցեցինք մեր դիվանագիտական ներկայացուցչությունների՝ հյուպատոսական բաժնի, մշակութային կենտրոնի և դեսպանատան կոորդինատները։ Չնայած դրան՝ տեղի ունեցան ևս երկու հարվածներ։ Սա Ադրբեջանի դիվանագիտական ներկայացուցչությունների դեմ նպատակաուղղված հարձակում է»,-ասել է Ալիևը։
Նա հավելել է, որ Բաքուն Մոսկվային ուղարկել է պաշտոնական բողոքի նոտա, իսկ Ռուսաստանի դեսպանը հրավիրվել է Ադրբեջանի ԱԳՆ։ Ադրբեջանի առաջնորդը Ռուսաստանի գործողությունները որակել է որպես «ոչ բարեկամական քայլ»։
ՌԴ արտաքին գործերի նախարարությունում ի պատասխան հայտարարել են, որ «զարմացած են» մեղադրանքներից։ Այնտեղ ընդգծել են, որ հարվածների պլանավորման ժամանակ իրականացվում է «ռազմական կիրառման տվյալների մանրակրկիտ վերահսկում՝ քաղաքացիական վնասը բացառելու համար», ինչպես նաև հաշվի է առնվում դիվանագիտական առաքելությունների տեղակայումը։
Ալիևի հայտարարությունները հնչել են Մոսկվայի և Բաքվի միջև հարաբերություններում ձգձգված ճգնաժամի ֆոնին, որը սրվել է 2024 թվականի դեկտեմբերին AZAL ավիաընկերության ինքնաթիռի կործանումից հետո։ Ինքնաթիռը Չեչնիայում խոցվել էր ռուսական ՀՕՊ համակարգի կողմից։ Ալիևին հրապարակայնորեն վիրավորել էր այն հանգամանքը, որ Ռուսաստանի նախագահ Վլադիմիր Պուտին-ը ողբերգությունից անմիջապես հետո չի զանգահարել իրեն և անձամբ ներողություն չի խնդրել։ Փոխարենը ադրբեջանական առաջնորդի հետ կապ էր հաստատել Չեչնիայի ղեկավար Ռամզան Կադիրովը, ինչը Բաքվում ընկալվել էր որպես ցուցադրական արհամարհանք։ Հետագայում Կրեմլը ստիպված էր սահմանափակվել պաշտոնական ներողություններով։
2025 թվականի աշնանը լարվածությունն ավելի է աճել՝ Եկատերինբուրգում Ադրբեջանի քաղաքացիների դեմ ռուս իրավապահների իրականացրած գործողությունից հետո։ Օպերացիայի ընթացքում ձերբակալվել է ավելի քան 50 մարդ, որոնցից երկուսը զոհվել են։ Բաքուն Մոսկվային մեղադրել է «արտադատական սպանությունների» մեջ և հարուցել քրեական գործ իր քաղաքացիների խոշտանգման և սպանության փաստով։
Կարճ ժամանակ անց Ադրբեջանում ձերբակալվել են «Sputnik Ադրբեջան» լրատվամիջոցի ղեկավարները՝ գործադիր տնօրեն Իգոր Կարտավիխը և գլխավոր խմբագիր Եվգենի Բելոուսովը։ Նրանց մեղադրանք է առաջադրվել խարդախության և ապօրինի ձեռնարկատիրության հոդվածներով։ Ավելի ուշ նրանք տեղափոխվել են Ռուսաստան։