Հասարակություն
09.11.2026 | 15:25
Թաղման նպաստի վճարման կարգը նույնը թողնելու և նախագիծը չեղարկելու մասին որոշումը նշանակում է, որ 2027 թվականի հունվարի 1-ից 1000 դրամով չի բարձրանա կենսաթոշակը, ինչի մասին նախապես հայտարարվել էր։ Այս մասին Factor TV-ի հարցմանն ի պատասխան հայտնեցին Աշխատանքի և բարեկեցության նախարարությունից։
«Քանի որ, ի սկզբանե հանրային քննարկման ներկայացված նախագիծը ենթադրում էր, որ թաղման նպաստները պետք է առավել թիրախային դառնային՝ ընդգրկելով միայն սոցիալապես անապահովներին, ինչը ենթադրում էր, որ այն բերելու էր բյուջետային միջոցների ազատման, որը նախատեսվում էր ուղղել կենսաթոշակների բարձրացմանը։ Բայց, քանի որ թաղման նպաստի կարգի փոփոխությունները չեն կատարվում և նախագիծն ԱԺ չի ուղարկվելու, հետևաբար բյուջետային միջոցներ չեն ազատվելու և կենսաթոշակներին ուղղվող 500-1000 ավելացումները ևս չեն իրականացվելու։ Թաղման նպաստի վճարման կարգի փոփոխման նախագիծը դրվել էր հանրային քննարկման, այդ արձագանքները հաշվի առնելով՝ հանգել ենք նախագծի չեղարկման»,- մանրամասներ ներկայացրեց նախարարի մամուլի քարտուղար Նվեր Կոստանյանը։
Հիշեցնենք՝ քիչ առաջ նախարար Արսեն Թորոսյանը հայտնեց, որ թաղման նպաստի շահառուների շրջանակը սահմանափակելու և այն առավել հասցեական դարձնելու նախաձեռնությունը չեղարկվել է․ գործող կարգում որևէ փոփոխություն չի կատարվի։ Նախարարի խոսքով՝ հանրային քննարկման դրված օրենսդրական փոփոխությունների նախագիծը լայն արձագանք էր ստացել, ինչից հետո հարցը քննարկվել է նաև Ազգային ժողովի «Քաղաքացիական պայմանագիր» խմբակցության պատգամավորների հետ։
«Ուսումնասիրելով հանրային արձագանքները և քննարկումներ ունենալով ԱԺ մեր գործընկերների հետ՝ որոշում ենք կայացրել այդ մասով նախաձեռնությունն առաջ չտանել։ Այսինքն՝ որևէ փոփոխություն չի իրականացվի, և այն բոլոր քաղաքացիները, որոնք այսօրվա կարգավորումներով ստանում էին այդ նպաստը, կշարունակեն ստանալ»,- նշել էր նախարարը։
Թորոսյանը հավելել էր, որ հանրային քննարկման ներկայացված օրենքի նախագիծն Ազգային ժողով չի ուղարկվի, և ոլորտում կպահպանվեն գործող իրավակարգավորումները։
Ռոզա Վարդանյան
Նկարը գեներացված է արհեստական բանականության միջոցով