Եգիպտոսում տեղի է ունեցել խոշոր երկաթուղային վթար․ Կահիրեից հարավ գտնվող Էլ-Այյատ շրջանում բախվել են երկու ուղևորատար գնացքներ, ինչի հետևանքով չորս վագոն դուրս է եկել ռելսերից, և մոտ 150 մարդ ստացել է տարբեր աստիճանի մարմնական վնասվածքներ։
Եգիպտոսի երկաթուղիների ազգային վարչության տվյալներով՝ Գիզայից դեպի Էլ-Ֆայյում ընթացող թիվ 134 գնացքը բախվել է Կահիրեից դեպի Ասուան ուղևորվող թիվ 2010 գնացքի հետնամասին։ Բախումը տեղի է ունեցել Կաֆր-Ամմար և Ռակկա կայարանների միջև՝ Էլ-Այյատի հատվածում։
Միջադեպի հետևանքով տուժածների թիվը օրվա ընթացքում շարունակել է աճել։ Եթե սկզբում հաղորդվում էր 60, ապա հետագայում այդ թիվը հասել է մոտավորապես 150-ի։ Միևնույն ժամանակ, Եգիպտոսի առողջապահության նախարարությունը հայտնել էր 64 վիրավորի մասին՝ առանց զոհերի մասին տեղեկատվության։ Մի շարք լրատվամիջոցներ նախնական տվյալներ էին հրապարակել թիվ 134 գնացքի մեքենավարի մահվան մասին, սակայն պաշտոնական գերատեսչություններն այն դեռևս չէին հաստատել։
Ուղևորների շտապ տարհանման և փրկարարական աշխատանքների համար դեպքի վայր է ուղարկվել ավելի քան 50 շտապօգնության մեքենա, գործընթացին ակտիվորեն ներգրավվել են նաև տեղի բնակիչները։ Տուժածների մեծ մասը ստացել է կոտրվածքներ ու սալջարդեր, նրանք անհապաղ տեղափոխվել են մոտակա բժշկական կենտրոններ, այդ թվում՝ Էլ-Այյատի և Բենի-Սուեյֆի հիվանդանոցներ։
Դեպքի վայրում ներկայում ծավալված են ոստիկանության, փրկարարական ջոկատների և վթարային բրիգադների լայնածավալ աշխատանքներ, կիրառվում է նաև ծանր տեխնիկա։ Վթարի պատճառով Կահիրե — Ասուան գծով գնացքների երթևեկությունը ժամանակավորապես դադարեցվել է։ Եգիպտոսի գլխավոր դատախազությունը քննչական խումբ է գործուղել տեղում հանգամանքները պարզելու համար, մինչդեռ մասնագետները զբաղված են հետևանքների վերացմամբ և գծերի վերականգնմամբ։