29-ամյա երիտասարդը տեղափոխվել էր հիվանդանոց, որտեղ նա նոյեմբերի 8-ին մահացել է. ՎԻԴԵՈ
ԵՐԵՎԱՆ, 8 նոյեմբերի․ /Նովոստի-Արմենիա/․ Երևանի քրեական ոստիկանները հայտնաբերել և ձերբակալել են 29-ամյա երիտասարդի դանակահարության մեջ կասկածվող անձին, փոխանցում է ոստիկանությունը։
ՆԳՆ ոստիկանության հաղորդմամբ, նախօրեին՝ նոյեմբերի 7-ին՝ ժամը 17։33-ին, ահազանգ է ստացվել, որ Բաղրամյան պողոտայում դանակահարված քաղաքացի կա։ Շտապօգնության խումբը կտրող-ծակող առարկայով հասցված վնասվածքներով 29-ամյա երիտասարդին տեղափոխել է հիվանդանոց, որտեղ նա մահացել է նոյեմբերի 8-ին։
Ոստիկանությունը պարզել է, որ դեպքը տեղի է ունեցել Լեմկինի փողոցում։
Օպերատիվ-հետախուզական միջոցառումների արդյունքում հայտնաբերվել և ձերբակալվել է հանցագործության մեջ կասկածվող՝ 2001 թվականին ծնված անձը։
Ըստ ոստիկանության՝ ձերբակալվածը հաշվառված է հոգեբուժական հաստատությունում։ Նախնական տեղեկություններով՝ նա և տուժողը միմյանց չեն ճանաչել և նախկինում երբևէ չեն հանդիպել։
Կազմված փաստաթղթերն ուղարկվել են Արաբկիր վարչական շրջանի քննչական բաժին։ Դեպքի հանգամանքները պարզվում են։