Սերբիայի Հանրապետական ընտրական հանձնաժողովը հրապարակել է երկրում խորհրդարանական ընտրությունների վերջնական արդյունքները։
«Ուսանողական ցուցակը» հաղթել է ստանալով ձայների 53,01%-ը, իսկ նախկին նախագահ Ալեքսանդր Վուչիչի գլխավորած «Միացյալ Սերբիա» դաշինքը հավաքել է 38,98%-ը։ Ոչ մի այլ կուսակցության չի հաջողվել հաղթահարել 3%-անոց շեմը։
«53 ընտրատեղամասերում կրկնակի քվեարկությունից հետո Հանրապետական ընտրական հանձնաժողովն (ՀԸՀ) այս երեկո հայտարարեց Սերբիայի արտահերթ խորհրդարանական ընտրությունների արդյունքները՝ հիմնվելով բոլոր 8392 ընտրատեղամասերի տվյալների վրա։ Ըստ այդ տվյալների՝ «Ուսանողական ցուցակը» ստացել է ձայների 53,01%-ը, իսկ «Ալեքսանդր Վուչիչ — Միացյալ Սերբիա» ցուցակը՝ 38,98%-ը», — նշված է հանձնաժողովի կայքում։
Նախնական տվյալներով՝ «Ուսանողական ցուցակը» 250 անդամ ունեցող Ազգային ժողովում (երկրի միապալատ խորհրդարանում) կստանա 141 տեղ, իսկ Վուչիչի գլխավորած դաշինքը, որի առանցքը իշխող «Սերբական առաջադիմական կուսակցությունն» է, կունենա 103 տեղ։
Նախկին նախագահն ընդունել է իր պարտությունը՝ ընդդիմության հաղթանակը որակելով որպես «հեղափոխության հաստատում», որն իրականացվել է «տարբեր եվրոպական երկրների և ամերիկյան «խորքային պետության» աջակցությամբ»։ Վերջինս նա բնորոշել է որպես մի խումբ, որը հակադրվում է ԱՄՆ ղեկավար Դոնալդ Թրամփին։