Իրավական ակտերի նախագծերի հրապարակման միասնական հարթակում հանրային քննարկման է ներկայացվել նախագիծ, որով նախատեսվում է Գեղարքունիքի մարզի Ջիլի միջնակարգ և Ծափաթաղի Հենրիկ Համբարձումյանի անվան միջնակարգ դպրոցները միաձուլման ձևով վերակազմակերպել՝ ստեղծելով մեկ դպրոց Ջիլ գյուղում։
Կառավարության որոշման նախագծի հիմնավորման համաձայն՝ երկու դպրոցների միավորման նպատակն է բարելավել կրթության որակը, կենտրոնացնել մանկավարժական ներուժը և արդյունավետ օգտագործել կրթական ռեսուրսները։
Նախատեսվում է երկու դպրոցները միաձուլման ձևով վերակազմակերպել՝ ստեղծելով «Հայաստանի Հանրապետության Գեղարքունիքի մարզի Ջիլի միջնակարգ դպրոց» պետական ոչ առևտրային կազմակերպությունը։ Նոր դպրոցը գործելու է Գեղարքունիքի մարզի Ճամբարակ համայնքի Ջիլ գյուղի 1-ին փողոց 73 հասցեում։ Նախագծով նախատեսվում է ապահովել երկու դպրոցների սովորողների ուսումնառության շարունակականությունը նորաստեղծ հաստատությունում։
Նախագծի հիմնավորման համաձայն՝ Ջիլի միջնակարգ դպրոցում սովորում է 107 աշակերտ, աշխատում է 23 մանկավարժական և 9 վարչատնտեսական աշխատակից։ Ծափաթաղի Հենրիկ Համբարձումյանի անվան միջնակարգ դպրոցում սովորում է 27 աշակերտ։ Դպրոցն ունի 17 մանկավարժական և 6 վարչատնտեսական աշխատակից։ Երկու դպրոցների միջև հեռավորությունը 10 կմ է, իսկ ճանապարհին հասնելու տևողությունը, ըստ նախագծի հիմնավորման, 10 րոպե է։
Կրթության, գիտության, մշակույթի և սպորտի նախարարությունը դպրոցների միավորման անհրաժեշտությունը պայմանավորում է սովորողների թվաքանակով, դպրոցների շենքային պայմաններով և կրթական ռեսուրսների արդյունավետ օգտագործման անհրաժեշտությամբ։
Հիմնավորման համաձայն՝ սակավաթիվ աշակերտներ ունեցող դպրոցներում կարող են սահմանափակվել սովորողների սոցիալականացման, թիմային աշխատանքի և առողջ մրցակցության հնարավորությունները։ Խնդիրներ կարող են առաջանալ նաև կայուն մանկավարժական թիմերի ձևավորման և ժամանակակից կրթական ենթակառուցվածքների արդյունավետ օգտագործման հարցերում։
Նախարարության նշել է, որ դպրոցների միավորումը թույլ կտա ձևավորել ավելի լիարժեք դասարաններ, կենտրոնացնել մանկավարժական ներուժը, բարելավել ուսուցիչների մեթոդական աջակցությունը և արդյունավետ օգտագործել լաբորատորիաները, թվային սարքավորումները, գրադարաններն ու մարզական ռեսուրսները։
Նախագծի համաձայն՝ Ծափաթաղի Հենրիկ Համբարձումյանի անվան միջնակարգ դպրոցին օգտագործման իրավունքով տրամադրված անշարժ գույքի հետագա օգտագործման վերաբերյալ առաջարկություն պետք է ներկայացնեն Պետական գույքի կառավարման կոմիտեի նախագահը և Գեղարքունիքի մարզպետը։ Այդ առաջարկությունը նախատեսվում է ներկայացնել որոշումն ուժի մեջ մտնելուց հետո՝ չորս ամսվա ընթացքում։ Այսպիսով, նախագծով դեռևս վերջնականապես որոշված չէ, թե ինչպես է հետագայում օգտագործվելու Ծափաթաղի դպրոցի շենքը։
Գեղարքունիքի մարզպետը որոշումն ուժի մեջ մտնելուց հետո երկու ամսվա ընթացքում պետք է ապահովի դպրոցների վերակազմակերպման հետ կապված աշխատանքները՝ ներառյալ գույքագրումը, փոխանցման ակտերի և միաձուլման պայմանագրի հաստատումը։ Այդ աշխատանքների ավարտից հետո երեք ամսվա ընթացքում պետք է ապահովվեն երկու դպրոցների գործունեության դադարեցումն ու Ջիլի միջնակարգ դպրոցի պետական գրանցումը։ ԿԳՄՍ նախարարը պետք է մեկ ամսվա ընթացքում հաստատի նոր դպրոցի կանոնադրությունը։ Նախագծով նախատեսվում է նաև համապատասխան փոփոխություններ կատարել անշարժ գույքի անհատույց օգտագործման պայմանագրերում։
Դպրոցների միավորման արդյունքում նախատեսվում է բարելավել սովորողների կրթական պայմանները, արդյունավետ օգտագործել կրթական ռեսուրսները և բարձրացնել կրթության որակը։ Աշակերտների տեղափոխումը կազմակերպվում է կանոնավոր, անվճար և անվտանգ եղանակով՝ սահմանված չվացուցակով ու ուղեկցողի առկայությամբ։ Ըստ ներկայացված տվյալների՝ դպրոցների միջև հեռավորությունը 10 կմ է, իսկ ճանապարհին հասնելու տևողությունը՝ 10 րոպե։
Նախագծի ընդունման կապակցությամբ պետական կամ տեղական ինքնակառավարման մարմինների բյուջեներում ծախսերի և եկամուտների ավելացում կամ նվազեցում չի նախատեսվում։