Հայաստանի Պրեմիեր լիգայի 11-րդ տուրի կենտրոնական՝ «Արարատ-Արմենիա» – «Նոա» հանդիպումից հետո կրքերը չեն հանդարտվում։ Այսօր՝ հոկտեմբերի 27-ին, «Նոա» ֆուտբոլային ակումբի մամուլի ծառայությունը հանդես է եկել կոշտ հայտարարությամբ՝ խիստ քննադատության ենթարկելով հանդիպումը սպասարկած մրցավար Հենրիկ Նալբանդյանի աշխատանքը։
Ակումբը հրապարակել է խաղային դրվագներից մեկը՝ այն վերնագրելով «Հենրիկ Նալբանդյանի խայտառակ մրցավարությունը», և կից ներկայացրել հետևյալ գրառումը.
«Գուցե մտածեք, որ այս խախտման համար սպիտակ խաղաշապիկով ֆուտբոլիստը կարմիր քարտ կստանա, բայց հայկական մրցավարության պայմաններում դեմքին արմունկով հարված ստացած Արամ Խամոյանն է դեղին քարտ ստանում։ Սա է հայկական մրցավարության և նշված մրցավարի իրական դեմքը, որի մասին բազմիցս խոսել ենք»։
Հիշեցնենք, որ 11-րդ տուրի շրջանակում կայացած սկզբունքային դիմակայությունում գործող չեմպիոն «Արարատ-Արմենիան» սեփական հարկի տակ 2:1 հաշվով առավելության էր հասել փոխչեմպիոն «Նոայի» նկատմամբ։