Հայաստանը չի խախտել իր պարտավորությունները Եվրասիական տնտեսական միության շրջանակում և չի պատրաստվում խախտել դրանք, հայտարարել է ՀՀ ԱԳՄԱ նախարար Արարատ Միրզոյանը
ԵՐԵՎԱՆ, 27 հոկտեմբերի․ /Նովոստի–Արմենիա/․ Հայաստանը չի խախտել իր պարտավորությունները Եվրասիական տնտեսական միության (ԵԱՏՄ) շրջանակում և չի պատրաստվում խախտել դրանք, հայտարարել է ՀՀ արտաքին գործերի և միջազգային առևտրի նախարար Արարատ Միրզոյանը:
Պատասխանելով լրագրողի հարցին Վիեննայի կոնվենցիայի հիման վրա ԵԱՏՄ-ին Հայաստանի անդամակցության կասեցման հնարավորության մասին՝ Միրզոյանը նշել է, որ ԵԱՏՄ հիմնադիր փաստաթղթերը չեն նախատեսում անդամ պետության հեռացման կամ Միությանը նրա մասնակցության սառեցման մեխանիզմ:
Միևնույն ժամանակ, նախարարը նշել է, որ համապատասխան մեխանիզմներ գոյություն ունեն միջազգային իրավունքում, սակայն դրանց կիրառման համար անհրաժեշտ են իրավական հիմքեր, մասնավորապես՝ պետության կողմից իր պարտավորությունների խախտումը:
«Հայաստանի Հանրապետությունը որևէ պարտավորություն ԵԱՏՄ շրջանակում չի խախտել և չի էլ պատրաստվում խախտել», – ընդգծել է Միրզոյանը:
Նախարարը հայտնել է, որ ծանոթացել է ԵԱՏՄ գործընկերների կողմից պատրաստված զեկույցին, որտեղ դիտարկվում են Միությանը Հայաստանի մասնակցության կասեցման իրավական հնարավորությունները:
«Ես հասկանում եմ, որ, գուցե, մեր գործընկերները ջանքեր են գործադրել, որպեսզի իրավական հիմնավորում գտնեն, բայց, կներեք, իրավական առումով համաձայն չեմ ներկայացվող հիմնավորումների հետ», – հայտարարել է նա:
Միրզոյանը նաև հնարավոր է համարել քաղաքական դրդապատճառների առկայությունը ԵԱՏՄ-ին Հայաստանի մասնակցության կասեցման իրավական մեխանիզմները դիտարկելիս:
«Բոլորս հասկանում ենք, որ իրավականը՝ իրավական, բայց այստեղ քաղաքական մղում կա և, գուցե, քաղաքական հանձնարարություն՝ իրավաբաններին որևէ իրավական հիմնավորում գտնել», – ասել է նախարարը:
Նրա խոսքով՝ Հայաստանը բարեխղճորեն կատարում է իր պարտավորությունները ԵԱՏՄ շրջանակում և նույնպիսի մոտեցում է ակնկալում մյուս անդամ պետություններից:
«Մենք հույս ունենք, որ ԵԱՏՄ մյուս գործընկերները մեր նկատմամբ իրենց՝ կազմակերպության շրջանակում և երկկողմ ունեցած պարտավորությունները բարեխղճորեն կկատարեն և չեն խախտի: Ցավոք, հակառակի օրինակներ ենք տեսնում վերջին ամիսներին», – նշել է Միրզոյանը:
Նախարարն ընդգծել է, որ հետագա որոշումներ կայացնելիս Երևանը ղեկավարվելու է Հայաստանի պետականության, անկախության և ինքնիշխանության շահերով:
«Մեր որոշումների և պահվածքի առանցքում է մեր պետականությունը, ՀՀ անկախությունը, ինքնիշխանությունը, այդ թվում՝ նաև ինքնուրույն որոշումներ կայացնելու, այս և այլ զանազան որոշումներ կայացնելու իրավունքը։ Մենք սա, գոնե, սակարկության առարկա չենք դարձնելու», – հայտարարել է նա:
ԵԱՏՄ զեկույցի մասին
2026 թվականի հոկտեմբերի 20-ին Ռուսաստանի, Բելառուսի, Ղազախստանի և Ղրղզստանի Եվրասիական միջկառավարական խորհրդի անդամները պատրաստել են զեկույց՝ Հայաստանի նկատմամբ ԵԱՏՄ մասին պայմանագրի գործողության կասեցման հնարավոր հետևանքների մասին։
Փաստաթուղթը հրապարակված է ՌԴ կառավարության կայքում և նախատեսված է Եվրասիական տնտեսական բարձրագույն խորհրդի դեկտեմբերյան նիստում ներկայացնելու համար։
Հեղինակների հաշվարկներով՝ դիտարկվող սցենարը կարող է հանգեցնել Հայաստանի ՀՆԱ-ի կրճատմանը 15,6%-ով կամ 4,6 միլիարդ դոլարով, բազային մակարդակի նկատմամբ գնաճի ավելացմանը 14,9 տոկոսային կետով և ԵԱՏՄ-ի հետ ապրանքաշրջանառության նվազեցմանը 55,6%-ով՝ 7,99 միլիարդ դոլարից հասնելով 3,55 միլիարդ դոլարի։
Փաստաթղթում դիտարկվում են նաև ռուսական գազի գնի ավելացումը մոտ 69%-ով՝ հազար խորանարդ մետրի դիմաց՝ 177,5 դոլարից հասնելով որպես ցուցիչ ներկայացվող 300 դոլարի, և ԵԱՏՄ երկրներից դրամական փոխանցումների կրճատումը՝ 3,95 միլիարդ դոլարից հասնելով 1,85 միլիարդ դոլարի։