Հայաստանում Ռուսաստանի դեսպանատունն արձագանքել է օրեր առաջ Շիրակի մարզպետ Դավիթ Առուշանյանի արած ձևակերպմանը։ Ընդդիմադիրներին դիմելով՝ Առուշանյանը նշել էր՝ «գյումրեցիները ձեր «իվանները» չեն»։
Ռուսաստանի դեսպանատունն Առուշանյանի այս ձևակերպումը Հայրենական Մեծ պատերազմի տարիների նացիստների բառապաշարի հետ է համեմատել՝ նշելով․
«Տարակուսանքով ընդունեցինք Շիրակի մարզպետ Դ. Վ. Արուշանյանի հրապարակած գրառման մեջ ինչ-որ «իվանների» հիշատակումը, ինչն ակամայից հիշեցնում է այն բառապաշարը, որն օգտագործում էին գերմանացի նացիստները՝ Հայրենական մեծ պատերազմի տարիներին։
Չէինք ցանկանա մտածել, որ այն մարզի ղեկավարը, որտեղ ծառայություն են իրականացնում ռուսական 102-րդ ռազմակայանի զինծառայողներն ու ռուս սահմանապահները, թույլատրելի է համարում հրապարակային հայտարարությունները, որոնք կարող են ռուսների նկատմամբ ազգային թշնամանք հրահրել։ Դա հիմնովին հակասում է մեր երկրների ժողովուրդների միջև դարավոր բարեկամության ոգուն»։