Զինծառայողների վնասների հատուցման ծրագիրը կընդլայնվի

ՀՀ կառավարության հոկտեմբերի 22-ի նիստում հավանության են արժանացել «Զինծառայողների կյանքին կամ առողջությանը պատճառված վնասների հատուցման մասին» և «Համապարփակ առողջապահական ապահովագրության մասին» օրենքներում փոփոխություններ կատարելու նախագծերը։ Օրենքի գործողության շրջանակն ընդլայնվում է՝ ընդգրկելով 1998 թվականի հունվարի 1-ից մինչև 2016 թվականի դեկտեմբերի 31-ն ընկած ժամանակահատվածում մարտական գործողությունների հետևանքով զինծառայողների կյանքին կամ առողջությանը պատճառված վնասների դեպքերը։

Ինչու է դա կարևոր. Նախագիծը վերացնում է տարիների անհավասարությունը նախկինում վիրավորում ստացած կամ զոհված զինծառայողների ընտանիքների աջակցության հարցում։ ՀՀ աշխատանքի և սոցիալական հարցերի նախարար Արսեն Թորոսյանի փոխանցմամբ՝ ծրագրի պոտենցիալ շահառու է 389 մարդ։ Նախարարը շեշտել է, որ հատուցման գումարների որևէ կրճատում չի լինի, իսկ որոշ դեպքերում տրամադրվող միջոցները նույնիսկ կավելանան։

Նոր կարգավորումների և հատուցման մեխանիզմների մանրամասները.

• Ընդգրկման ժամանակահատվածները.

  • 1998թ. հունվարի 1 – 2007թ. դեկտեմբերի 31. Հատուցման ենթակա են դեպքերը, եթե առկա են անձնական գործի փաստաթղթերը: Փաստաթղթերի բացակայության դեպքում փաստը հաստատվում է միջգերատեսչական հանձնաժողովի եզրակացությամբ կամ դատական կարգով:

  • 2008թ. հունվարի 1 – 2016թ. դեկտեմբերի 31. Մարտական գործողություններից պատճառված վնասները ևս պաշտոնապես ճանաչվում են հատուցման ենթակա:

• Վճարման ձևաչափը. 1998–2016թթ. դեպքերի համար միանվագ վճար չի կատարվի։ Փոխարենը՝ 20 տարվա ընթացքում կվճարվեն հավասար ամսական գումարներ՝ 2017 թվականի հունվարի 1-ից հետո տեղի ունեցած դեպքերի համար սահմանված չափերով։

• Իրավական հստակեցում. Սահմանվում են ամսական հավասար վճարումների ընթացակարգերը, ինչպես նաև հատուցման գումարների վճարումը կասեցնելու հիմքերն ու ժամկետները: