Երևանում քննարկվել է Երևանյան լճի մաքրման հարցում Պեկինի փորձի կիրառման հնարավորությունը
ԵՐԵՎԱՆ, 19 հոկտեմբերի․/Նովոստի–Արմենիա/․ Երևանում քննարկվել են Երևանյան լճի բնապահպանական խնդիրները, տարածքի բարեկարգման ծրագրերը, ինչպես նաև գետերի և ջրավազանների մաքրման ոլորտում Պեկինի փորձի կիրառման հնարավորությունները։
Ինչպես հաղորդում է Երևանի քաղաքապետարանը, COP17-ի շրջանակում Երևան է ժամանել Պեկինի փոխքաղաքապետ Վեն Սյանի գլխավորած պատվիրակությունը։
Երևանյան լճի տարածքում պատվիրակությանը դիմավորել է Երևանի քաղաքապետարանի բնապահպանության վարչության պետի ժ\պ Սիրարփի Հայկազյանը։
Ներկայացվել են լճի ջրի որակին, ջրամբարի սեյսմակայունությանը և նստվածքների մաքրմանն առնչվող հիմնախնդիրները։ Ներկայացվել է նաև առաջիկայում իրականացվելիք բարեկարգման հայեցակարգը՝ Երևանյան լիճն ու հարակից տարածքն ավելի մաքուր, բարեկարգ և գրավիչ դարձնելու նպատակով։
Քննարկվել են գետերի և ջրավազանների մաքրման ոլորտում Պեկինի փորձն ու Երևանում դրա կիրառման հնարավորությունները։