Հոկտեմբերի 10-ին Քրեական ոստիկանության Շիրակի մարզային վարչության ծառայողները թմրամիջոցի իրացման վերաբերյալ օպերատիվ տեղեկություն էին ստացել։
Քրեական ոստիկանները օպերատիվ-հետախուզական միջոցառումների արդյունքում նույն օրը Առափի բնակավայր տանող ճանապարհին հայտնաբերել, թմրամիջոցների իրացման հիմնավոր կասկածանքով ձերբակալել և «ԳԱԶ-3110» մակնիշի մեքենայով հանդերձ՝ մարզային վարչություն են տեղափոխել Գյումրի քաղաքի բնակիչ 33-ամյա երիտասարդին։ Նրա անձնական խուզարկությամբ հայտնաբերվել է մարիխուանա տեսակի թմրամիջոց։ Պարզվել է, որ թմրամիջոցը իրացնելու նպատակով երիտասարդին փոխանցել էր Գյումրիի բնակիչ 59-ամյա տղամարդը։
Նախաձեռնվել է քրեական վարույթ, որի շրջանակում կատարված զննությամբ 59-ամյա տղամարդու՝ Շահումյան փողոցում գտնվող տան հարակից օժանդակ շինությունում հայտնաբերվել են մարիխուանա տեսակի թմրամիջոցի զանգվածով տարաներ՝ ավելի քան 500 գրամ քաշով։
Գյումրիի բնակիչ 33-ամյա և 59-ամյա տղամարդիկ տեղափոխվել են ձերբակալվածների պահման վայր։
Կատարվում է նախաքննություն։
ՆԳՆ ոստիկանություն