ԱՄՆ նախագահ Դոնալդ Թրամփը հայտնել է, որ խորհուրդ է տվել Սպիտակ տան նոր մամուլի քարտուղար Քեթի Զաքարիային վերանայել իր պաշտոնը՝ աշխատանքի անհաջող մեկնարկից հետո։ Այս մասին նա ասել է Սպիտակ տանը լրագրողների հետ զրույցում, հայտնում է Bloomberg-ը։
Թրամփի խոսքով՝ ինքը Զաքարիային ասել է. «Պարտադիր չէ, որ դու դա անես, եթե չես ուզում»՝ հավելելով, որ իր կարծիքով՝ նրա հետ «կոպիտ են վարվել»։
«Ես նրան ասացի՝ անկեղծ ասած, քո տեղը լինեի, կվերանայեի այդ որոշումը»,- նշել է Թրամփը։
Հարցին՝ արդյոք ինքը կստիպի Զաքարիային հեռանալ պաշտոնից, ԱՄՆ նախագահը պատասխանել է. «Թող նա ինքն ընդունի այդ որոշումը»։
Նա նշել է, որ նախընտրական հանրահավաքներ կանցկացնի Ջորջիա և Կենտուկի նահանգներում, իսկ հանգստյան օրերը կանցկացնի Փալմ Բիչում։ Դրանից հետո կզրուցի Զաքարիայի հետ։
«Ես նրան ասացի՝ կարծում եմ՝ ավելի լավ կլինի, եթե դու երջանիկ լինես, և վստահ չեմ, որ երբևէ կկարողանաս երջանիկ լինել այս աշխատանքում։ Ես ասացի՝ Քեթի՛, քեզ պե՞տք է սա։ Չեմ կարծում, որ քեզ դա պետք է»,- հայտարարել է ԱՄՆ նախագահը։
Զաքարիան պաշտոնը զբաղեցնում է ընդամենը մեկ շաբաթ։ Նրա կենսագրության և մասնագիտական որակավորման վերաբերյալ հարցեր են առաջացել այն բանից հետո, երբ նա իրեն ներկայացրել է որպես իրավաբան՝ չնայած փաստաբանական քննությունը չհանձնելուն։ Բացի այդ, նրա առաջին ճեպազրույցը անհաջող է անցել։
Զաքարիան փոխարինել է Քերոլայն Լևիթին՝ Թրամփի երկարամյա խորհրդականին, որը մամուլի քարտուղարի պաշտոնը լքել է օգոստոսին։
Այս ամենը տեղի է ունենում նոյեմբերին կայանալիք Կոնգրեսի միջանկյալ ընտրություններից երկու շաբաթից մի փոքր ավելի առաջ։ Հանրապետականները փորձում են համոզել թերահավատ ընտրողներին աջակցել իրենց՝ կյանքի թանկացող արժեքի պատճառով առաջացած դժգոհության ֆոնին։