ԱՊՀ անդամ պետությունների պաշտպանության նախարարությունների ղեկավարները Ղրղզստանի Չոլպոն-Աթա քաղաքում Համագործակցության պաշտպանության նախարարների խորհրդի նիստի ժամանակ ստորագրել են 2027 թվականի աշխատանքային պլանը։ Այս մասին հայտարարել է Ղրղզստանի պաշտպանության նախարարությունը։
«Պաշտպանության նախարարների խորհրդի նիստից հետո ստորագրվել են համաձայնեցված փաստաթղթեր, որոնք արտացոլում են 2026 թվականի աշխատանքի արդյունքները, ինչպես նաև ԱՊՀ անդամ պետությունների պաշտպանության նախարարների խորհրդի 2027 թվականի աշխատանքային պլանը», – ասվում է հայտարարության մեջ։
Հանդիպման մասնակիցները նաև լսել են իրենց գործընկերների զեկույցները Բելառուսի զինված ուժերում մարտական պատրաստության պլանավորման պրակտիկայի, Ռուսաստանի զինված ուժերում մարտական պատրաստության կազմակերպման վերաբերյալ՝ հիմնվելով հատուկ ռազմական գործողությունների փորձի վրա, Տաջիկստանի զինված ուժերի կողմից վարժանքներ անցկացնելու պրակտիկայի և Ղազախստանի զինված ուժերի ՄԱԿ-ի խաղաղապահ առաքելություններում ունեցած փորձի վերաբերյալ։
«Հետագա աշխատանքների ընթացքում հանդիպման մասնակիցները քննարկել են անօդաչու համակարգերի և ռոբոտացված համակարգերի գործնական կիրառումը ժամանակակից մարտական գործողությունների ժամանակ ինժեներական աջակցության խնդիրների լուծման գործում, նաև անօդաչու թռչող սարքերի մարտական օգտագործման փորձը հարձակողական ու պաշտպանական գործողություններում», – նշվում է հայտարարության մեջ։
Նիստում քննարկվել է նաև ԱՊՀ անդամ պետությունների զորքերի օպերատիվ և մարտական պատրաստության կազմակերպման հարցը՝ «կոլեկտիվ անվտանգության ապահովման շահերից ելնելով»։
Չոլպոն-Աթայում Պաշտպանության նախարարների խորհրդի նիստին մասնակցել են Ռուսաստանի, Ադրբեջանի, Բելառուսի, Ղազախստանի, Տաջիկստանի և Ուզբեկստանի պաշտպանության նախարարները, ինչպես նաև ԱՊՀ քարտուղարության ներկայացուցիչները։