Հակակոռուպցիոն դատարանը վարույթ է ընդունել Գլխավոր դատախազության՝ ապօրինի ծագում ունեցող գույքի բռնագանձման վերաբերյալ հերթական հայցադիմումը:
Գլխավոր դատախազության՝ ապօրինի ծագում ունեցող գույքի բռնագանձման գործերով վարչությունը պահանջ է ներկայացրել ՀՀ Ազգային ժողովի պատգամավոր, աշխատանքի և սոցիալական հարցերի նախկին նախարար Աղվան Վարդանյանի և նրա հետ փոխկապակցված անձանց նկատմամբ։
Դատախազությունը պահանջել է հօգուտ Հայաստանի Հանրապետության բռնագանձել 3 անշարժ գույք, ինչպես նաև մեկ այլ անշարժ գույքի վարձակալությունից գոյացած եկամուտը։
Բռնագանձման ենթակա գույքի ցանկում ընդգրկվել է նաև մեկ տրանսպորտային միջոց և երեք իրավաբանական անձանցում ունեցած մասնակցությունը։
Բացի այդ, դատախազությունը պահանջել է բռնագանձել բանկում ներդրված երկու ավանդներն ու դրանց դիմաց հաշվեգրված տոկոսագումարները։
Ինչպես նաև պահանջվում է բռնագանձել․
- 43 միլիոն 65 հազար դրամ՝ որպես ապօրինի եկամտի մնացորդ
- 192 միլիոն 99 հազար դրամ, որը չի հիմնավորվում անձի օրինական եկամուտներով, ունի ապօրինի ծագում, փոխանցվել է բարեխիղճ ձեռքբերողի կամ հնարավոր չէ նույնականացնել և բռնագանձել։