Ընթացիկ տարվա առաջին կիսամյակում Կատարի ընդհանուր եկամուտները նվազել են 42%-ով Հորմուզի նեղուցի շուրջ ստեղծված ճգնաժամի ֆոնին։ Այս մասին հայտարարել է արաբական պետության էմիր շեյխ Թամիմ բին Համադ Ալ Թանին՝ ելույթ ունենալով Խորհրդատվական խորհրդի 55-րդ տարեկան նստաշրջանի բացմանը։
«Բնականաբար, ճգնաժամը բացասական ազդեցություն է ունեցել պետական ֆինանսների վրա. տարվա առաջին կիսամյակում ընդհանուր եկամուտները նվազել են 42%-ով, մինչդեռ պետական ծախսերը կրճատվել են 14%-ով», – մեջբերել է Կատարի լրատվական գործակալությունը էմիրի խոսքերը։
Պետության ղեկավարն ընդգծել է, որ այդ կրճատումը տեղի է ունեցել «առանց վնաս հասցնելու կենսական նշանակության ծառայություններին կամ զարգացման առաջնահերթություններին»։
Ըստ էմիրի՝ Հորմուզի նեղուցի փակումը և «Ռաս Լաֆֆան» արդյունաբերական գոտում էներգետիկ որոշ օբյեկտներին հասցված ուղղակի վնասը կասեցրել են պետության արտահանման զգալի մասը։ Նա նշել է, որ Կատարին է բաժին ընկնում հեղուկացված բնական գազի (ՀԲԳ) համաշխարհային առևտրի մոտ մեկ հինգերորդ մասը, ինչը նշանակում է, որ ցանկացած խափանում «արագորեն ազդում է շուկաների և սպառողների վրա ամբողջ աշխարհում»։