Քաղաքականություն
09.10.2026 | 18:34
Ռուսաստանի նախագահ Վլադիմիր Պուտինը, Հայաստանի վարչապետ Նիկոլ Փաշինյանը և Ադրբեջանի նախագահ Իլհամ Ալիևը Թուրքմենստանում Կասպյան գագաթնաժողովից հետո փակ հանդիպում են անցկացրել։ Այս մասին տեղեկացել է «Կոմերսանտ»-ի հատուկ թղթակից Անդրեյ Կոլեսնիկովը։
Հանդիպման մասին նախապես չէր հայտարարվել։ Այն տևել է շուրջ 15 րոպե։ Հանդիպման անցկացման մասին պայմանավորվել է Ռուսաստանի նախագահի օգնական Յուրի Ուշակովը։ ԱՊՀ երկրների ղեկավարների ընդլայնված կազմով նիստի փակ հատվածի ընթացքում նա այդ հարցով առանձին զրուցել է Նիկոլ Փաշինյանի և Իլհամ Ալիևի հետ, նշում է աղբյուրը։
Հայաստանի վարչապետը չի մասնակցել Կասպյան գագաթնաժողովին, սակայն սպասել է դրա ավարտին՝ Վլադիմիր Պուտինի և Իլհամ Ալիևի հետ հանդիպելու համար։
Մինչ Վլադիմիր Պուտինի Թուրքմենստան մեկնելը՝ Յուրի Ուշակովը հայտարարել էր, որ Վլադիմիր Պուտինի և Նիկոլ Փաշինյանի հանդիպում նախատեսված չէ։ Սակայն Ռուսաստանի նախագահի օգնականը չէր բացառել, որ միջոցառման շրջանակում նրանք կարող են շփումներ ունենալ։
Թարգմանությունը՝ Էմմա Չոբանյանի