Մեծ Բրիտանիան դեռևս լրացուցիչ մաքսատուրքեր չի սահմանել չինական էլեկտրամոբիլների նկատմամբ՝ ի տարբերություն ԱՄՆ-ի և ԵՄ-ի։ Սակայն Բրյուսելի ճնշումը և «Made in Europe» պահանջները կարող են ստիպել Լոնդոնին փոխել իր քաղաքականությունը։
Մեծ Բրիտանիայում չինական էլեկտրամոբիլների նկատմամբ կիրառվում է ընդամենը 10% ստանդարտ ներմուծման մաքսատուրք։ Ինչպես նշում է CNBC-ն, երկիրը շարունակում է մնալ խոշորագույն արտասահմանյան շուկաներից մեկը, որտեղ հատուկ լրացուցիչ մաքսատուրքեր չեն սահմանվել հենց չինական ավտոմեքենաների նկատմամբ։
Սա կտրուկ հակադրվում է ԱՄՆ-ի իրավիճակին, որտեղ 100% մաքսատուրքը փաստացի փակել է չինական էլեկտրամոբիլների մուտքը շուկա։ Մեծ Բրիտանիայի խոշորագույն առևտրային գործընկերը՝ Եվրամիությունը չինական էլեկտրամոբիլների համար սահմանել է մինչև 35.3% լրացուցիչ մաքսատուրքեր։ Դրանք գանձվում են բոլոր ներմուծվող ավտոմեքենաների նկատմամբ կիրառվող 10% ստանդարտ մաքսատուրքից բացի, պարզաբանում է CNBC-ն։
Այժմ, ինչպես նշվում է հոդվածում, Մեծ Բրիտանիայի առջև բարդ ընտրություն է դրված․ ԵՄ-ի առաջարկները կարող են ստիպել Լոնդոնին չինական էլեկտրամոբիլների նկատմամբ մաքսատուրքերը բարձրացնել մինչև եվրոպական մակարդակ։
Հանգստյան օրերին The Sunday Times թերթը հաղորդել է, որ Մեծ Բրիտանիայի բիզնեսի նախարար Ջոնաթան Ռեյնոլդսը քննարկում է չինական էլեկտրամոբիլների նկատմամբ ԵՄ մակարդակին համապատասխան մաքսատուրքեր սահմանելու հնարավորությունը։ Դա թույլ կտար խուսափել այսպես կոչված «Made in Europe» պահանջների հնարավոր բացասական հետևանքներից, որոնք կարող են հարվածել ԵՄ շուկա արտադրանք մատակարարող բրիտանական ընկերություններին։
Բրիտանական կառավարության ներկայացուցիչը CNBC-ին հաստատել է, որ Լոնդոնը դեռևս լրացուցիչ մաքսատուրքեր չի սահմանել չինական էլեկտրամոբիլների նկատմամբ, սակայն հավելել է՝ շարունակում են սերտորեն համագործակցել ոլորտի ներկայացուցիչների հետ՝ ապահովելու համար, որ իրենց քաղաքականությունն արտացոլի ինչպես ոլորտի, այնպես էլ Մեծ Բրիտանիայի ազգային շահերը։
Ինչպես պարզաբանում է CNBC-ն, «Made in Europe» պահանջները ԵՄ ավելի լայն արդյունաբերական նախաձեռնության մաս են կազմում։ Դրանց նպատակն է եվրոպական արտադրողներին պաշտպանել միջազգային անբարեխիղճ մրցակցությունից՝ առաջնահերթություն տալով Եվրոպայում արտադրված ապրանքներին։
Սեպտեմբերին ԵՄ ներկայացուցիչը Financial Times-ին հայտնել էր, որ «Made in Europe» պահանջների հետ կապված խոչընդոտներից խուսափելու համար Լոնդոնը ստիպված կլինի բարձրացնել չինական էլեկտրամոբիլների մաքսատուրքերը և ավելի սերտորեն համաձայնեցնել իր առևտրային քաղաքականությունը ԵՄ-ի հետ։
Ինչպես նշում է CNBC-ն, որոշում կայացնելը հեշտ չի լինի․ վարչապետը ձգտում է բարելավել հարաբերությունները ԵՄ-ի հետ, որից Մեծ Բրիտանիան պաշտոնապես դուրս է եկել 2020 թվականին։ Սակայն մաքսատուրքերի բարձրացումը կարող է Չինաստանի պատասխան միջոցների պատճառ դառնալ։
Ավտոաշխարհի նորությունները հրապարակվում են ՌԵԳՈ ԻՆՇՈՒՐԱՆՍ ապահովագրական ընկերության աջակցությամբ, որը ներկայացնում է ԿԱՍԿՈ ապահովագրություն։ Կասկոն կօգնի անսպասելի իրավիճակներում պահպանել կայուն ֆինանսական վիճակ։