Reuters գործակալության փոխանցմամբ՝ Նիկոլ Փաշինյանը հայտարարել է, որ Ադրբեջանի նախագահ Իլհամ Ալիևի հետ քննարկել է հակամարտության տարիներին անհետ կորած անձանց ճակատագրերի բացահայտման և այդ հարցերով զբաղվող հանձնաժողովների աշխատանքների ակտիվացման անհրաժեշտությունը։
Ինչպես հայտնում է միջազգային լրատվամիջոցը, Բաքվում անցկացված համաժողովի ընթացքում ադրբեջանական կողմը ներկայացրել է երկկողմ շփումների վերաբերյալ մանրամասներ՝ նշելով, որ 2025 թվականի փետրվարից երկու երկրների համապատասխան հանձնաժողովները գտնվում են ուղիղ կապի մեջ։ Ըստ Reuters-ի մեջբերած տվյալների՝ հունվարին հայկական կողմը տրամադրել էր 50 անհետ կորած հայերի ԴՆԹ տվյալներ, որոնք, սակայն, չեն համընկել Ադրբեջանում հայտնաբերված աճյունների հետ։ Միևնույն ժամանակ, Բաքուն Երևանին է փոխանցել 834 քաղաքացիների ցուցակ, որոնք, ըստ ադրբեջանական կողմի, գերեվարվել են Արցախյան առաջին պատերազմի ժամանակ։
Reuters-ը նաև հիշեցնում է, որ անհետ կորածների որոնման և տեղեկատվության փոխանակման հարցերը ներառված են 2025 թվականի օգոստոսին Վաշինգտոնում նախաստորագրված խաղաղության համաձայնագրի 9-րդ հոդվածում։ Չնայած փաստաթղթի նախաստորագրմանը՝ վերջնական համաձայնագիրը դեռևս պաշտոնապես չի ստորագրվել։