Քաղաքականություն
08.10.2026 | 12:28
Կառավարության նիստից հետո վարչապետ Նիկոլ Փաշինյանն անդրադարձավ եկեղեցի-պետություն հարաբերություններին, վարչապետի դիպլոմ ունենալու վերաբերյալ հնարավոր քննարկումներին, ադրբեջանցի զինծառայողի սահմանն անցնելուն, ինչպես նաև «Արմատ Մեդիայի» և հեռուստաընկերությունների եթերներին։
Արձագանքելով լրագրողի հարցին, թե արդյոք եկեղեցին կարող է հանձնաժողով ստեղծել և քննարկել վարչապետի դիպլոմ չունենալու հարցը՝ Նիկոլ Փաշինյանը նշեց, որ որևէ խնդիր չի տեսնում, թող ստեղծեն․ «Վարչապետի դիպլոմ չունենալը անհամատեղելի չէ վարչապետի պաշտոնի հետ, իսկ Կտրիճ Ներսիսյանի աղջիկ ունենալը անհամատեղելի է Կաթողիկոսի պաշտոնի հետ։ Այսինքն՝ տարբերությունը զգո՞ւմ եք»։
Վարչապետը հավելեց, որ 1991 թվականից ի վեր իր կյանքն ու գործունեությունը լիովին հետագծելի են, և ինքը պատրաստ է աջակցել ցանկացած հանձնաժողովի աշխատանքին։
Անդրադառնալով Հայաստանում հայտնված ադրբեջանցի զինծառայողին՝ Փաշինյանը հայտնեց, որ նախնական տվյալներով նա ինքնակամ է լքել ծառայությունը։ Մանրամասները, ըստ վարչապետի, կպարզաբանվեն քրեական գործի քննության ընթացքում։
Լրագրողի դիտարկմանը «Արմատ Մեդիայի» աշխատակիցների կապարակնքված դռների և առգրավված հեռախոսների վերաբերյալ՝ Նիկոլ Փաշինյանը խոստացավ լրացուցիչ հետաքրքրվել այդ գործընթացով։
Մանրամասները՝ տեսանյութում։
Եվգենյա Համբարձումյան