13 մլրդ 200 մլն դրամ՝ հետվճարի համար
13 մլրդ 200 մլն դրամ կհատկացվի անկանխիկ եղանակով վճարումներից կենսաթոշակառուներին հետվճարի տրամադրման միջոցառման շարունակականությունն ապահովելու նպատակով։ Նախագիծը ներկայացրել է Աշխատանքի և բարեկեցության նախարար Արսեն Թորոսյանը։ Այդ գումարը տրամադրվելու է պետական բյուջեով նախատեսված ՀՀ կառավարության պահուստային ֆոնդի միջոցների հաշվին, որպեսզի կարողանան անկանխիկ եղանակով վճարումներից կենսաթոշակառուներին հետվճարի գծով 2026 թվականի 4-րդ եռամսյակում ծախսերի կատարման համար անհրաժեշտ միջոցներ տրամադրեն։
Ծախսերի լրացուցիչ պահանջը, ըստ հիմնավորման, հիմնականում պայմանավորված է կենսաթոշակների և նպաստների չափերի ավելացմամբ։ Պահանջվող գումարն անհրաժեշտ է կենսաթոշակները, նպաստները և հետվճարը ամբողջությամբ կատարելու համար։
Ֆինանսների նախարարությունը նախագծի վերաբերյալ նշել է․ «Հաշվի առնելով, որ 2026 թվականի ինն ամիսների ՀՀ պետական բյուջեի փաստացի եկամուտներն էականորեն գերազանցել են պլանային ցուցանիշները, և մուտքագրվել են լրացուցիչ եկամուտներ, առաջարկում ենք միջոցառման ֆինանսավորման աղբյուր դիտարկել ՀՀ 2026 թվականի պետական բյուջեի հարկային եկամուտներն ու պետական տուրքերը՝ համապատասխան չափով ավելացնելով նաև ՀՀ պետական բյուջեի եկամուտների և ծախսերի պլանային ցուցանիշները»։
Երբ կառավարությունը հավանություն տա, վարչապետի ստորագրելուց հետո որոշումն ուժի մեջ կմտնի պաշտոնական հրապարակմանը հաջորդող օրվանից։