ՌԴ Անվտանգության խորհրդի քարտուղարի տեղակալ Ալեքսեյ Շևցովը հայտարարել է, թե Հայաստանում «Թրամփի ուղի» (TRIPP) նախագծի իրականացման դեպքում կարող են տեղակայվել ամերիկյան մասնավոր ռազմական ընկերություններ և հետախուզական ենթակառուցվածքներ։
«Պետք է նկատի ունենալ, որ ստեղծվելիք ամերիկա-հայկական ընկերությանն է տրվելու ճանապարհի ամբողջ երկայնքով անվտանգության ապահովումը, մինչդեռ հայկական կողմն իրականացնելու է սահմանային և մաքսային վերահսկողություն։ Գործնականում դա կարող է նշանակել ամերիկյան մասնավոր ռազմական ընկերությունների մուտքը Հայաստանի տարածք և այս երկրում՝ բառացիորեն Իրանի սահմանից մի քանի հարյուր մետր հեռավորության վրա, ամերիկյան հետախուզական, իսկ հնարավոր է՝ նաև այլ ենթակառուցվածքների հայտնվելը»,- ասել է Շևցովը։
ՌԴ ԱԽ քարտուղարի տեղակալի խոսքով՝ դա կասկածի տակ է դնում ամբողջ երթուղու և դրանով իրականացվող փոխադրումների անվտանգությունը։
««Թրամփի երթուղու» վերաբերյալ համաձայնագրի իրականացման հետ կապված բոլոր վեճերը լուծվում են ԱՄՆ-ի և Նյու Յորք նահանգի օրենսդրությանը համապատասխան, իսկ կապալառու ընկերությանը փոխանցվում են հողատարածքի օգտագործման բացառիկ իրավունքները», – նշել է Շևցովը։
Նրա խոսքով՝ դա ենթադրում է, որ ամերիկացիները կկարողանան «ֆիլտրել» իրենց կողմից վերահսկվող երթուղու հատվածով անցնող բեռները, այլ կերպ ասած՝ հրաժարվել այս կամ այն դեպքում իրենց ծառայությունները տրամադրելուց․ « Դա, օրինակ, կարող է ձևակերպվել որպես «պատժամիջոցային» արգելք ամերիկյան ընկերությունների, այդ թվում՝ երթուղու օպերատորի համար՝ այս կամ այն տնտեսական օպերատորի հետ համագործակցելու վերաբերյալ»։
«Համապատասխանաբար, հաշվի առնելով համաձայնագրի պայմանները և ԱՄՆ-ի ներկայիս քաղաքականությունը, այդ թվում՝ Հորմուզի նեղուցը «փակելու» նրանց վերջին փորձերը, ապագա տրանսպորտային միջանցքի հուսալիությունը բավականին կասկածելի է թվում»,- հայտարարել է Շևցովը։
Ավելի վաղ էլ նա հայտարարել էր, թե ցանկացած այլ երկրից գազ գնելը Հայաստանին զգալիորեն ավելի թանկ կարժենա, քան Ռուսաստանից այն ներմուծելը։
Թարգմանությունը՝ Էմմա Չոբանյանի