ՀՀ աշխատանքի և բարեկեցության նախարար Արսեն Թորոսյանը կառավարության նիստից հետո հայտարարել է, որ 2027 թվականից պետական աշխատողների սոցիալական փաթեթի տրամադրման ծրագիրը կդադարեցվի։ Որոշման իրագործման համար կառավարությունը նախատեսում է համապատասխան օրենսդրական փոփոխություններ:
Փոփոխության պատճառներն ու մանրամասները.
-
Ծրագրի նպատակը. Սոցփաթեթը ներդրվել էր 2012–2013 թթ.՝ որպես պետական համակարգում ցածր վարձատրության փոխհատուցման միջոց (առողջարանային, հանգստի, սպորտի, ուսման և այլ ծախսերի համար):
-
Փոխարինող գործոնները. Ըստ նախարարի՝ տարատեսակ բարեփոխումների արդյունքում բարձրացվել են աշխատավարձերը, իսկ առողջապահության ապահովագրությունը լայն հնարավորություն է տալիս ծածկելու առողջապահական ծախսերը։ Ծրագիրն իր առջև դրված խնդիրն արդեն կատարել է։
-
Աշխատավարձերի բարձրացում. 2027 թվականի հունվարի 1–ից նախատեսվում է տասնյակ հազարավոր հանրային ծառայողների աշխատավարձերի բարձրացում։
-
Կուտակված գումարները. Այս պահին քաղաքացիների բանկային հաշիվներին կա շուրջ 13 մլրդ դրամ կուտակված գումար: Դրանք հնարավոր կլինի օգտագործել կառավարության հատուկ որոշումից հետո՝ գործող կամ սահմանվելիք այլ ուղղություններով։
«Սոցփաթեթի շրջանակում մեր քաղաքացիները կարող էին որոշակի ծառայություններ գնել՝ առողջարանային, հանգստի, սպորտի, ուսման և այլն: Հատկապես վերջին տարիներին, սակայն, այն քաղաքացիները, որոնք ունեին սոցիալական փաթեթ, տարատեսակ բարեփոխումների արդյունքում ունեցել են թե՛ աշխատավարձի բարձրացումներ, թե նաև առողջապահության ապահովագրության շնորհիվ ավելի մեծ հնարավորություն՝ ծածկելու իրենց առողջապահական ծախսերը։ Հիմա եկել է ժամանակը ավարտելու այդ ծառայության մատուցումը, քանի որ այն իր առջև դրված խնդիրը կատարել է»,- նշել է Արսեն Թորոսյանը:
Թվերով. Ծրագիրն ընդգրկում է 130 000–133 000 շահառու (պետական ծառայողներ, կրթության, մշակույթի և սոցիալական պաշտպանության ոլորտների աշխատակիցներ): Մեկ լրիվ դրույքով աշխատողին տարեկան հատկացվում է 72 հազար դրամ, ինչը պետական բյուջեից պահանջում է տարեկան շուրջ 9.5 մլրդ դրամ:
Պետական համակարգում աշխատավարձերի բարձրացման և առողջապահական ապահովագրության համակարգի ընդլայնմանը զուգահեռ՝ կառավարությունը հրաժարվում է ուղղակի բյուջետային սոցիալական աջակցության այս մոդելից: