Էյֆելյան աշտարակը կառավարող Société d’exploitation de la tour Eiffel (SETE) ընկերության գլխավոր տնօրեն Պատրիկ Բրանկո Ռուիվոն 2026 թվականի վերջին կլքի իր պաշտոնը։ Այս որոշումը կայացվել է ներքին քննությունից հետո, որը վերաբերում էր հնդկական պատվիրակության խնդրանքով կին աշխատակիցներին աշխատանքից ժամանակավորապես հեռացնելու աղմկահարույց միջադեպին, հայտնում է AFP գործակալությունը։
Արտակարգ պատահարը տեղի է ունեցել սեպտեմբերի 5-ին՝ Bochasanwasi Akshar Purushottam Swaminarayan Sanstha (BAPS) միջազգային հնդուական կազմակերպության պատվիրակության այցի ընթացքում։ Ըստ Le Monde-ի տվյալների՝ այս շարժումը մոտ է կանգնած Հնդկաստանի վարչապետ Նարենդրա Մոդիի կուսակցությանը։ Կազմակերպության ներկայացուցիչները SETE-ի ղեկավարությանն առաջարկել էին սահմանափակել իրենց պատվիրակության շփումները կանանց հետ։
Արդյունքում՝ որոշ կին աշխատակիցների հրահանգվել էր լքել աշխատատեղերը և տեղափոխվել ծառայողական տարածքներ, իսկ առանձին հենակետերում նրանց փոխարինել էին տղամարդկանցով։ Կանանց նաև արգելվել էր հայտնվել որոշակի գոտիներում, քանի դեռ այնտեղ գտնվում էին հյուրերը։ Արհմիությունները հայտարարել են, որ աշխատակցուհիներին «հեռացրել, փոխարինել և անտեսանելի են դարձրել բացառապես իրենց սեռի պատճառով»։
Սկանդալը բողոքի ալիք է բարձրացրել անձնակազմի շրջանում, ինչի հետևանքով գործադուլ է հայտարարվել, և Էյֆելյան աշտարակը մեկ օրով փակվել է այցելուների համար։ Հետագայում SETE-ն ընդունել է, որ չպետք է համաձայներ նման պայմաններին, իսկ BAPS-ը ներողություն է խնդրել տեղի ունեցածի համար։ Ընկերությունը մտադիր է ստեղծել արարողակարգային հատուկ բաժին և ուժեղացնել գենդերային հավասարության պահպանմանն ուղղված քայլերը։