ԱՄՆ-ի առցանց խանութների վաճառքները ձմեռային տոնական սեզոնի ընթացքում՝ նոյեմբերի 1-ից դեկտեմբերի 31-ը, այս տարի կհասնեն ռեկորդային մակարդակի, կանխատեսում է Adobe Inc. ընկերությունը։
Adobe-ը սպասում է, որ այդ ժամանակահատվածում վաճառքների ծավալը կաճի մինչև 275.1 միլիարդ դոլար՝ նախորդ տարվա ցուցանիշը գերազանցելով 6.7%-ով։
Ընկերության կարծիքով՝ «կիբերերկուշաբթին» կշարունակի մնալ սեզոնի ամենամեծ օրը՝ առցանց վաճառքների ծավալով։ Adobe-ի կանխատեսմամբ՝ այդ օրը վաճառքները կհասնեն 15.1 միլիարդ դոլարի, ինչը 6.2%-ով ավելի է, քան 2025 թվականին արձանագրված ցուցանիշը։
Ընկերությունն ակնկալում է, որ «Սև ուրբաթին» վաճառքների աճի տեմպն ավելի բարձր կլինի՝ 9.2%։ Դրան մասամբ կնպաստեն այնպիսի ապրանքների կատեգորիաների համար նախատեսված ամենախոշոր զեղչերը, ինչպիսիք են հեռուստացույցները, հագուստը և կենցաղային տեխնիկան։ Adobe-ի կանխատեսմամբ՝ այդ օրը վաճառքների ծավալը կկազմի 12.9 միլիարդ դոլար։
Ընկերությունում նշում են, որ սպառողները շարունակում են տոնական գնումներն ավելի վաղ ժամկետների տեղափոխել։ Այն փաստը, որ Amazon.com Inc.-ն իր Prime Day զեղչային ակցիան անցկացնում է հոկտեմբերին, խթանում է ամերիկյան մյուս մանրածախ առևտրականներին լրացուցիչ զեղչեր առաջարկել նոյեմբերից շատ առաջ։ Adobe-ի կանխատեսմամբ՝ հոկտեմբերին ԱՄՆ-ի առցանց խանութների վաճառքները կհասնեն 95.8 միլիարդ դոլարի՝ նախորդ տարվա համեմատ աճելով 8%-ով։
Ընկերությունն ակնկալում է, որ տոնական զեղչերի շրջանում սպառողները կպահեստավորեն առաջին անհրաժեշտության ապրանքներ։ Adobe-ի կանխատեսմամբ՝ «կիբեր շաբաթվա» ընթացքում՝ Գոհաբանության օրվանից մինչև «կիբերերկուշաբթի» ընկած հինգ օրերին, անձնական հիգիենայի միջոցների վաճառքը կարող է ավելի քան կրկնապատկվել, իսկ հիմնական հագուստի վաճառքը՝ ավելի քան եռապատկվել։