Ուզբեկստանի Սամարղանդ քաղաքում ավարտված Շախմատի համաշխարհային 46-րդ օլիմպիադայում Հայաստանի տղամարդկանց և կանանց հավաքականները արժանացել են բրոնզե մեդալների «Ա» խմբի հատուկ հաշվարկում։ Այս մասին պաշտոնապես հայտնում է Հայաստանի շախմատի ֆեդերացիան։
Երկու հավաքականներն էլ ընդհանուր մրցաշարային աղյուսակում զբաղեցրել են 6-րդ հորիզոնականը, իսկ «Ա» խմբի հատուկ հաշվարկում դարձել երրորդը։ Արման Փաշիկյանի գլխավորած տղամարդկանց թիմի կազմում հանդես էին գալիս գրոսմայստերներ Հայկ Մարտիրոսյանը, Ռոբերտ Հովհաննիսյանը, Շանթ Սարգսյանը, Գաբրիել Սարգսյանը և Մանուել Պետրոսյանը։ Կանանց հավաքականի կազմում, Զավեն Անդրիասյանի գլխավորությամբ, ելույթ ունեցան Լիլիթ Մկրտչյանը, Մարիամ Մկրտչյանը, Էլինա Դանիելյանը, Սուսաննա Գաբոյանը և Անահիտ Մկրտչյանը։
Թիմային հաջողությունից զատ, մեր շախմատիստներն արժանացան նաև անհատական մեդալների։ Մարիամ Մկրտչյանը 11 հնարավորից վաստակեց 9 միավոր և 2-րդ խաղատախտակի վրա նվաճեց արծաթե մեդալ, իսկ Շանթ Սարգսյանը 11 հնարավորից 8 միավորով 3-րդ խաղատախտակի վրա արժանացավ բրոնզե մեդալի։
Մրցաշարի ընթացքում հատկանշական էին նաև սկզբունքային մրցակիցների նկատմամբ տարած հաղթանակները, քանի որ կանանց ընտրանին սեպտեմբերի 23-ին, իսկ տղամարդկանց հավաքականը սեպտեմբերի 25-ին առավելության հասան Ադրբեջանի թիմերի նկատմամբ։ Սեպտեմբերի 16–27-ն անցկացված օլիմպիադայում, տղամարդկանց 204 հավաքականների պայքարում չեմպիոնի տիտղոսը նվաճեց Ուզբեկստանը, իսկ կանանց 187 թիմերի մրցապայքարում հաղթող ճանաչվեց Չինաստանի հավաքականը։