Ժամանակակից տեխնոլոգիական առաջընթացի անվերահսկելի տեմպերն ու մարդկային արժանապատվության պահպանման հիմնախնդիրները հայտնվել են Վատիկանի ուշադրության կենտրոնում։ Ֆրանսիա կատարած պետական այցի առաջին իսկ օրը Հռոմի Լևոն XIV Պապը հանդես է եկել ծավալուն հայտարարություններով՝ նախազգուշացնելով, որ տեխնոլոգիական միջավայրի անվերահսկելի ընդլայնումը կարող է էապես խաթարել մարդկային բնույթն ու բարոյական արժեքները։ Associated Press գործակալության փոխանցմամբ՝ քահանայապետն իր ելույթներում անդրադարձել է արհեստական բանականության, միջուկային սպառազինությունների նոր մրցավազքի և կյանքի իրավունքի պաշտպանության հիմնահարցերին։
Պոնտիֆիկոսի պաշտոնական ծրագիրը մեկնարկել է Ելիսեյան պալատում՝ Ֆրանսիայի նախագահ Էմանուել Մակրոնի և երկրի բարձրաստիճան ղեկավարության հետ հանդիպմամբ, որից հետո Սրբազան Քահանայապետը ելույթ է ունեցել Փարիզում գտնվող ՅՈՒՆԵՍԿՕ-ի կենտրոնակայանում՝ դիվանագիտական կորպուսի ներկայացուցիչների առջև։
«Եթե չենք ուզում կորցնել մեր մարդկայնությունը մեր առօրյա ներխուժող ու այն կարգավորող «մեքենաների դրախտում», հրատապ անհրաժեշտություն է զարգացնել բարոյական պատշաճն ընկալելու և էթիկական սահմանները տարբերակելու կարողությունը», — ընդգծել է Լևոն XIV-ը։
Հռոմի Պապն արձանագրել է ժամանակակից հասարակության խորքային հակասությունը․ մինչ համակարգչային ալգորիթմներին վերագրվում է «բանականություն», մարդկային հարաբերություններն ու անհատները հաճախ գնահատվում են բացառապես տնտեսական արդյունավետության և արտադրողականության չափանիշներով։ Նա կոչ է արել տեխնոլոգիաների մշակմամբ և կարգավորմամբ զբաղվող պատասխանատուներին չշտապել և առաջնահերթությունը տալ մարդու բարօրությանը՝ թույլ չտալով ցածր արտադրողականություն ունեցող անձանց մեկուսացումը հասարակական կյանքից։
Արհեստական բանականության մարտահրավերներից զատ, Լևոն XIV-ը կրկին վերահաստատել է Վատիկանի սկզբունքային դիրքորոշումը միջուկային զինատեսակների վերաբերյալ։ Նրա համոզմամբ՝ միջուկային զսպման հայեցակարգը չի ապահովում կայունություն, այլ ընդհակառակը՝ հրահրում է սպառազինությունների նոր մրցավազք։
«Խաղաղությունը ուժերի հավասարակշռություն չէ, այն կերտվում է օրեցօր՝ երկխոսության և արդարության միջոցով», — հայտարարել է քահանայապետը։
Փարիզում Սրբազան Քահանայապետն անդրադարձել է նաև Ֆրանսիայի քրիստոնեական ժառանգությանն ու կյանքի իրավունքի պաշտպանության անհրաժեշտությանը։ Հիշեցնենք, որ 2024 թվականին Ֆրանսիան Սահմանադրությամբ ամրագրեց հղիության արհեստական ընդհատման իրավունքը, իսկ վերջերս երկրի խորհրդարանն ընդունեց անբուժելի հիվանդ չափահասներին մահացու դեղամիջոցների տրամադրումը նախատեսող օրինագիծը, ինչին դեմ էր արտահայտվել Կաթոլիկ եկեղեցին։
Օրվա ավարտին Լևոն XIV-ը պատարագ է մատուցել 2019 թվականի ավերիչ հրդեհից հետո վերականգնված Փարիզի Աստվածամոր տաճարում (Notre-Dame)։ Սա Հռոմի Պապի առաջին պաշտոնական պետական այցն է Ֆրանսիա վերջին 18 տարվա ընթացքում։ Քառօրյա այցի շրջանակներում նախատեսվում են նաև այցելություններ Լուրդ և Մեց քաղաքներ, որտեղ քահանայապետը կմասնակցի Եվրոպայում խաղաղության ամրապնդմանը նվիրված միջոցառումներին։