ՀՀ Ազգային ժողովի նախագահ Ռուբեն Ռուբինյանը սեպտեմբերի 25-ին ընդունել է Հայաստանում Ֆրանսիայի Հանրապետության նորանշանակ արտակարգ և լիազոր դեսպան Ֆլորիան Էսկյուդիեին, շնորհավորել պատասխանատու պաշտոնը ստանձնելու կապակցությամբ և հաջողություններ մաղթել դիվանագիտական առաքելությունն իրականացնելու ընթացքում։
Հանդիպման ժամանակ կողմերը կարևորել են Հայաստանի և Ֆրանսիայի միջև հաստատված բարեկամական հարաբերությունները՝ շեշտելով դրանք հետագայում առավել խորացնելու և ընդլայնելու անհրաժեշտությունը։
Զրուցակիցներն անդրադարձել են նաև երկու երկրների խորհրդարանների միջև ձևավորված արդյունավետ փոխգործակցությանը՝ կարևորելով դրա հետագա ամրապնդումը։
Կողմերը կարևոր են համարել համագործակցությունն ընդլայնել նաև տնտեսական, ենթակառուցվածքային, կրթական, մշակութային և այլ բնագավառներում։
Հանդիպմանը շեշտվել է, որ Հայաստանի և Ֆրանսիայի միջև Ռազմավարական գործընկերության հռչակագիրը նոր հնարավորություններ է ընձեռել երկկողմ հարաբերություններն ավելի խորացնելու և բազմաբովանդակ զարգացում ապահովելու համար։
Ռուբեն Ռուբինյանն ու Ֆլորիան Էսկյուդիեն նաև մտքեր են փոխանակել տարածաշրջանին առնչվող մի շարք հարցերի վերաբերյալ։