Ռուսաստանի նախագահի՝ օտարերկրյա պետությունների հետ ներդրումային և տնտեսական համագործակցության գծով հատուկ ներկայացուցիչ Կիրիլ Դմիտրիեւը մեկնել է ԱՄՆ՝ Սթիվ Վիթկոֆֆի, Ջարեդ Քուշների և Սպիտակ տան այլ պաշտոնյաների հետ բանակցություններ վարելու համար, գրել է Reuters-ը։
Սա նրա առաջին նմանատիպ այցն է անցյալ տարվա դեկտեմբերից ի վեր. այս մասին հայտնել են հանդիպումների նախապատրաստական աշխատանքներին ծանոթ երկու աղբյուրներ։
Աղբյուրները նշել են, որ Դմիտրիեւի խորհրդակցությունները ԱՄՆ նախագահի ներկայացուցիչների հետ տեղի կունենան Նյու Յորքում՝ ՄԱԿ-ի Գլխավոր ասամբլեայի ընթացքում, և կշարունակեն սեպտեմբերին Կրեմլում Ռուսաստանի նախագահ Վլադիմիր Պուտինի, Վիտկոֆֆի և Քուշների միջև կայացած հանդիպման ընթացքում քննարկված հարցերը։
ԱՄՆ պետքարտուղար Մարկո Ռուբիոն չորեքշաբթի օրը Ռուսաստանի արտաքին գործերի նախարար Սերգեյ Լավրովի հետ հանդիպումից հետո լրագրողներին հայտնել է, որ թե՛ Մոսկվան, թե՛ Կիեւը հետաքրքրություն են ցուցաբերել սահմանափակ հրադադարի գաղափարի նկատմամբ, որը կվերաբերի հացահատիկային և էներգետիկ ենթակառուցվածքներին։ ԱՄՆ բարձրաստիճան դիվանագետը նաև հույս է հայտնել, որ Պուտինը կընդունի դեկտեմբերին ԱՄՆ-ում կայանալիք G20-ի գագաթնաժողովին մասնակցելու հրավերը։
Reuters-ի աղբյուրը նշել է, որ Դմիտրիեւի՝ Նյու Յորք կատարած այցի նպատակը Ռուսաստանի և ԱՄՆ-ի միջև երկխոսությունը շարունակելն է։ Բանակցությունները կենտրոնանալու են երկու երկրների միջև տնտեսական համագործակցության, էներգետիկ հարցերի և Ուկրաինայում հակամարտության կարգավորման վրա։