Հոլիվուդյան նախկին ազդեցիկ պրոդյուսերը Հարվի Վայնշտեյնը դատապարտվել է ևս 15 տարվա ազատազրկման՝ իր դեմ հարուցված քրեական գործերից մեկի վերաքննությունից հետո։ Վայնշտեյնն ավելի վաղ դատապարտվել էր երկարատև ազատազրկման սեռական բնույթի մի շարք հանցագործությունների համար։
Նոր դատավճիռը կայացվել է Նյու Յորքի դատարանի կողմից՝ կապված այն մեղադրանքի հետ, ըստ որի՝ Վայնշտեյնը (այժմ՝ 74 տարեկան) 2006 թվականին հարկադրել է հեռուստատեսային արտադրության օգնական Միրիամ Հեյլիին կատարել օրալ սեքս։
Սկզբնապես՝ 2020 թվականին, Նյու Յորքում Վայնշտեյնը դատապարտվել էր 23 տարվա ազատազրկման՝ այս և մեկ այլ մեղադրանքի համար։ Նա բողոքարկել էր դատավճիռը, և 2024 թվականին վերաքննիչ դատարանը կարգադրել էր վերաքննել գործը՝ արձանագրելով, որ դատավորը լուրջ սխալներ էր թույլ տվել։
Ավելի քան մեկ տարի առաջ՝ 2025 թվականի հունիսին, ատենակալների կազմը Վայնշտեյնին արդարացրել էր մեկ մեղադրանքի մասով, սակայն մեղավոր ճանաչել մեկ այլ մեղադրանքով, որը վերաբերել էր Միրիամ Հեյլիի դեպքին։ Դատավորը սահմանել է նոր պատիժը։
Մեղադրող կողմը պահանջել է 20 տարվա ազատազրկում, մինչդեռ պաշտպանական կողմը նշել է, որ տարեց Վայնշտեյնը կարող է մահանալ բանտում։
Բացի Նյու Յորքի դատավճռից, Վայնշտեյնին (ով 74 տարեկան է և տառապում է քաղցկեղով ու շաքարային դիաբետով) ազատազրկում է սպառնում նաև Կալիֆոռնիայում. 2021 թվականին Լոս Անջելեսի դատարանը նրան մեղավոր էր ճանաչել իր դեմ ներկայացված բռնաբարության և սեռական բնույթի այլ հանցագործությունների 11 մեղադրանքներից երեքով և դատապարտել 16 տարվա ազատազրկման։
Վայնշտեյնը բողոքարկել է նաև այդ դատավճիռը։
Չորեքշաբթի օրը, լեփ-լեցուն դատական նիստերի դահլիճում, նա դատավորին խնդրել է գթասրտություն ցուցաբերել։