ՀՅԴ անդամ Գերասիմ Վարդանյանն առաջադրվել է Արտաշատ խոշորացված համայնքի ղեկավարի թեկնածու՝ հոկտեմբերի 25-ին նախատեսված ՏԻՄ ընտրություններում գլխավորելով կուսակցության համամասնական ցուցակը։
Վարդանյանն իր ֆեյսբուքյան էջում գրել է, որ առաջադրվելով որպես տեղի իշխանությունների գլխավոր և հիմնական ընդդիմախոս՝ իրենց քաղաքական այլընտրանքն ենք առաջարկում Արտաշատ խոշորացված համայնքի բնակիչներին՝ պայքարելով նրանց վերարտադրության դեմ։
«Սա համարում եմ իմ ու իմ գաղափարակից ընկերների՝ այս իշխանությունների ապազգային քաղաքականության դեմ փողոցից, բանտերից, դատարաններից տարիներ շարունակվող պայքարի հերթական հանգրվանն ու մարտահրավերը։
Տևական ժամանակ տարբեր ճանապարհներով, այս իշխանությունները համայնքները զավթելով՝ դրանք դարձրել են իրենց հանձնվողականության, ապազգային քաղաքականության և վերարտադրության հենարան»,-ասվում է գրառման մեջ:
Վարդանյանը կոչ է արել մասնակցել ընտրությանը և քաղաքական անհամաձայնություն հայտնել օրվա «իշխանությունների պարտվողական, հանձնվողական և ապազգային քաղաքականությանը»։
2026 թվականի աշնանը Հայաստանում տեղական ինքնակառավարման մարմինների ընտրություններ կանցկացվեն 46 համայնքում։ Կենտրոնական ընտրական հանձնաժողովը քվեարկության համար սահմանել է երեք օր՝ սեպտեմբերի 27-ը, հոկտեմբերի 25-ը և նոյեմբերի 29-ը։ Ընտրությունները տարբեր համայնքներում անցկացվելու են համամասնական և մեծամասնական ընտրակարգերով։