«Գլոբալ հարավը» պետք է մասնակցի որոշումների կայացման այն գործընթացներին, որոնք ուղղակիորեն ազդում են իր ապագայի վրա. սա պահանջում է ՄԱԿ-ի և ընդհանրապես բազմակողմանիության համակարգի բարեփոխում, հայտարարել է Հնդկաստանի արտաքին գործերի նախարար Սուբրահմանյամ Ջայշանկարը։
««Գլոբալ հարավը» պետք է մասնակցի որոշումների կայացման այն կառույցներին, որոնք զբաղվում են մեր ապագայի վրա ուղղակիորեն ազդող խնդիրներով… ՄԱԿ-ի և ընդհանրապես բազմակողմանիության համակարգի բարեփոխումը կենսական նշանակություն ունի՝ ապահովելու համար, որ «Գլոբալ հարավի» առաջնահերթությունները հաշվի առնվեն», – ասել է Ջայշանկարը ՄԱԿ-ի Գլխավոր ասամբլեայի 81-րդ նստաշրջանի շրջանակներում «Գլոբալ հարավի» երկրների և բարեկամ պետությունների բարձր մակարդակի հանդիպման ժամանակ։
«Այսօր «Գլոբալ հարավը» գուցե գլոբալ ճգնաժամի առաջնագծում է, սակայն որոշումների կայացման գործընթացում մնում է վերջին տեղում», – նշել է պաշտոնյան։
Ջայշանկարը հայտարարել է, որ «Գլոբալ հարավի» երկրների միջև համերաշխությունն այժմ առավել քան երբևէ կարևոր է։
«Մինչ մենք պետք է դիմեինք բազմակողմանի համագործակցությանը, դրա փոխարեն ականատես ենք լինում դրա քայքայմանը։ Միջազգային կազմակերպությունները, որոնցից լուծումներ էինք ակնկալում, ինքնին դարձել են խնդիր, որը պահանջում է մեր միջամտությունը», – ասել է նախարարը։
Նա կոչ է արել «Գլոբալ հարավի» երկրներին օգտագործել առկա հարթակները՝ քննարկելու տարածաշրջանի մարտահրավերները և կանխելու իրենց շահերի անտեսումը։