«Հրապարակ»․ թերթը գրում է ․ Վաղարշապատում երեկ տեղի ունեցած խուզարկությունների եւ 10 հոգու ձերբակալության «քավորը», ըստ մեր աղբյուրի, նորընտիր համայնքապետ Արգիշտի Մեխակյանն է։ Ավագանու ամենամեծ ընդդիմադիր խմբակցության ղեկավար Սեւակ Խաչատրյանի թիմակիցների ձերբակալության հիմքում թեպետ դրել են նոյեմբերի 16-ի ընտրություններին «մարդկանց ուղղորդելու» մեղադրանքներ, սակայն պարզ է, որ նախընտրական բռնաճնշումներ են սկսել ընդդիմության աչքը վախեցնելու նպատակով։
Ասում են՝ Մեխակյանն է ղեկավարությանը համոզել, որ հիմիկվանից պետք է զբաղվել ընդդիմադիրներով թույլ չտալ, որ ընտրություններին ընդառաջ ակտիվանան, պետք է բնում խեղդել ամեն ակտիվություն, եւ ինքն էլ է գործի անցել՝ համայնքի ընդդիմադիրների հետեւից է ընկել՝ պահակից մինչեւ ուսուցիչ, հայտնաբերում է եւ հարցերը լուծում։ Մեր տեղեկություններով, Սեւակ Խաչատրյանի «Առաջ» կուսակցությունը մտնելու է Ռոբերտ Քոչարյանի ղեկավարած դաշինքի մեջ, ու նաեւ սա է այս ձերբակալությունների պատճառը:
«Փաստ» օրաթերթը գրում է.
Որքան Նիկոլ Փաշինյանը ձախողվում է Հայ առաքելական եկեղեցու դեմ հայտարարած պատերազմում, այնքան նորանոր մեթոդներ են հնարում՝ Եկեղեցին քանդելու ուղղությամբ: Ըստ այդմ, մեր ունեցած տեղեկություններով, գործող իշխանությունների հակաօրինական բռնաճնշումները առաջիկայում կարող են նոր թափ ստանալ։ ՔՊ մեր աղբյուրները փոխանցում են, որ Փաշինյանը ցանկություն ունի ընդհուպ քրեական գործ հարուցել Ամենայն հայոց կաթողիկոսի դեմ և փորձել կալանավորել նրան մինչև Ավստրիայում կայանալիք Եպիսկոպոսաց ժողովը, այսինքն՝ առաջիկա մի քանի օրվա ընթացքում։
Նախօրեին Նիկոլ Փաշինյանը Հանրային հեռուստաընկերության եթերում նույնիսկ բացահայտել է (կարևոր էլ չէ՝ կամա թե ակամա), թե ինչպես է պատկերացնում Հայ առաքելական եկեղեցու դեմ նոր հետապնդումները։ «…Մենք այսօր ունենք ինֆորմացիա, որ ճշտման փուլում է, այդ թվում՝ Հայաստանյայց առաքելական սուրբ եկեղեցու ձևաչափերով, Հայաստանի Հանրապետություն են մուտք գործում ստվերային գումարներ քաղաքական նպատակով Հայաստանում օգտագործելու համար»,- ասել է նա։
Հայ առաքելական եկեղեցու դեմ գործող իշխանությունները մի քանի դրվագներով են փորձում պայքարել։ Եվ, մասնավորաբար, հասկանալով, որ կուսակրոնության և քաղաքական չեզոքության վերաբերյալ հայտարարությունները, Եզրաս Սրբազանի՝ իբր ՊԱԿ գործակալ լինելու թղթերն առանձնապես լուրջ արձագանք չեն գտել հանրության շրջանում, Փաշինյանը հիմա էլ անցել է Հայ առաքելական եկեղեցուն այլ եղանակով վարկաբեկելու գործին՝ հայտարարելով, թե Եկեղեցուն փոխանցված նվիրատվություններն օգտագործվել են Հայաստանում քաղաքական նպատակներով օգտագործելու համար։ Թեպետ ինքն էլ խոստովանում է, որ ինֆորմացիան ճշտման փուլում է, բայց և բնական է, որ իրավապահ համակարգն ու դատախազությունը կատարելու են Փաշինյանի ապօրինի հրահանգները՝ դրա համար օգտագործելով Հայ առաքելական եկեղեցու՝ տարբեր տարիներին արտերկրից ստացած նվիրատվությունների գումարների վերաբերյալ տեղեկատվական ամբողջ բազան։
Ըստ մեր աղբյուրի, ներկայում որոշակի ճշգրտումներ են անում, բանկերից ստանում են տեղեկություններ, փորձում Եկեղեցուն և այդ գումարները փոխանցողներին կապել օտարերկրյա հատուկ ծառայությունների՝ հատկապես ռուսական ծառայությունների հետ, և այդ կերպ հիմքեր ստեղծել Կաթողիկոսի և մի շարք բարձրաստիճան հոգևորականների դեմ քրեական գործեր վարույթներ նախաձեռնելու համար՝ նրանց մինչև Եպիսկոպոսաց ժողովը կալանավորելու նպատակով։ Փաշինյանն ինքն էլ հասկանում է, որ սա լրջագույն ու ծանր հետևանքներ է ունենալու իր և իր իշխանության համար, բայց և այլ տարբերակ չունի Եպիսկոպոսաց ժողովը խափանելու ճանապարհին։