Ուկրաինայի նախագահ Վլադիմիր Զելենսկին պատրաստակամություն է հայտնել ընդունել ԱՄՆ-ի առաջարկը՝ Ուկրաինայի և Ռուսաստանի միջև էներգետիկ ենթակառուցվածքների դեմ փոխադարձ հարվածները դադարեցնելու մասին, սակայն որոշակի պայմաններով։ Տեսաուղերձում նա ընդգծել է, որ Կիևը քայլեր կձեռնարկի լարվածության թուլացման ուղղությամբ միայն այն դեպքում, եթե Վաշինգտոնն ապահովի Ռուսաստանի իրական պատրաստակամությունը՝ դադարեցնելու պատերազմը, գրում է DW-ի ռուսական ծառայությունը։
«Այժմ Միացյալ Նահանգների կողմից կա կարևոր առաջարկ կրիտիկական նշանակության ենթակառուցվածքների նկատմամբ փոխադարձ հարձակումները դադարեցնելու վերաբերյալ։ Եվ եթե դա կարող է դառնալ ապաէսկալացիայի առաջին քայլը՝ ենթադրելով, որ Ռուսաստանը կդադարեցնի հարձակումները մեր կրիտիկական նշանակության ենթակառուցվածքների վրա, իսկ մենք՝ մեր պատասխան հարվածները, ապա Ուկրաինան պատրաստ է աջակցել ապաէսկալացիային»,- ասել է նա։
Միաժամանակ, Ուկրաինայի նախագահը նշել է, որ «առայժմ ոչ ոք չի տեսել Ռուսաստանի՝ պատերազմն ավարտելու իրական ցանկությունը»։
«Անհրաժեշտ է ուժեղ, արդարացի որոշում, և ոչ թե «ընտրությունների» համար, այլ երկարաժամկետ։ Մենք մեր գործընկերներից կոնկրետություն ենք ակնկալում»,- հայտարարել է Վլադիմիր Զելենսկին։
ԱՄՆ նախագահ Դոնալդ Թրամփն իր Truth Social սոցիալական ցանցում գրել էր, որ Ռուսաստանը և Ուկրաինան համաձայնել են դադարեցնել միմյանց էներգետիկ ենթակառուցվածքների վրա հարձակումները։ Դիզելային վառելիքի համաշխարհային գների աճը նա «մեծ մասամբ» կապել էր Ռուսաստանի և Ուկրաինայի պատերազմի, այլ ոչ թե ԱՄՆ-ի և Իրանի միջև հակամարտության հետ։
Ռուսաստանից Սպիտակ տան ղեկավարի այս հայտարարության վերաբերյալ դեռևս պաշտոնական մեկնաբանություն չի հնչել։ Financial Times-ի՝ Կրեմլի դիրքորոշմանը ծանոթ աղբյուրների տեղեկություններով՝ ՌԴ նախագահ Վլադիմիր Պուտինը մտադիր չէ մինչև ձմռան սկսվելը դադարեցնել Ուկրաինայի էներգետիկ ենթակառուցվածքների վրա հարձակումները, քանի որ կարծում է, որ դա կարող է մեծացնել ճնշումը Կիևի վրա՝ ստիպելու զիջումների գնալ։ Օգոստոսի վերջին ՌԴ Պաշտպանության նախարարությունը հայտարարել էր, որ երկրի զինված ուժերն Ուկրաինայի էներգետիկ օբյեկտների վրա նոր զանգվածային հարձակումներ են նախապատրաստում։
Ավելի վաղ էլ Թրամփը Կիևին կոչ էր արել դադարեցնել Ռուսաստանի դիզելային ենթակառուցվածքների վրա հարձակումները.
«Դուք պետք է դադարեցնեք Ռուսաստանում դիզելային վառելիքի վրա հարձակումները։ Դա վնաս է հասցնում ամբողջ աշխարհին»,- հայտարարել էր ԱՄՆ նախագահը։
Թարգմանությունը՝ Էմմա Չոբանյանի